ՀՀ սփյուռքի նախարարությունը Հայ ոսկերիչների հիմնադրամի (AJF) հետ համատեղ նախաձեռնել է կրթաթոշակի շնորհում հինգ հայ ուսանողների՝ «Ադամանդի դասակարգում» մասնագիտությամբ ուսանելու նպատակով:

Դասընթացի շրջանակներում Հայ ոսկերիչների հիմնադրամին կաջակցի Հայկական հեմոլոգիական լաբորատորիա-ակադեմիան (AGLA): Ավարտական քննությունները հաջողությամբ հանձնելու դեպքում՝ շրջանավարտները կդառնան ադամանդի դասակարգման հավաստագրված փորձագետներ, ինչը թույլ կտա վերջիններիս շարունակել իրենց գործունեությունը ոսկերչության և ադամանդագործության ոլորտում:

Դիմորդները պետք է բավարարեն AGLA-ի ընդունելության պահանջները:  Ուսուցումը, ինչպես և ուսումնական ձեռնարկները հայերեն լեզվով են, ուստի հայերենի իմացությունը պարտադիր է: Դիմորդները պետք է լինեն հայ` նվիրված հայկական ավանդույթներին ու սովորույթներին և հավատարիմ իրենց ազգամշակութային ժառանգությանը: Նախընտրելի է, որ դիմորդներն ունենան ֆիզիկայի և քիմիայի տարրական գիտելիքներ: Տեսական դասաժամերը սկսվում են ժ.18:00-ին, իսկ գործնական պարապմունքներն ընթանալու են ազատ գրաֆիկով: Դասընթացներն իրականացվելու են ամեն օր, բացի շաբաթ, կիրակի և տոնական օրերից: Ծրագիրը մեկնարկելու է 2015թ. սեպտեմբերից և ներառելու է ադամանդի ուսումնասիրության բոլոր ոլորտները: Հայտերի և լրացված փաստաթղթերի հանձման վերջնաժամկետը 2015թ. օգոստոսի 30-ն է:

Առաջնությունը կտրվի Երևանի, ՀՀ մարզերի, Արցախի, Հայաստան բռնագաղթված սիրիահայ համայնքի և սփյուռքահայ համայնքների արժանի դիմորդներին:

Ուսումնական ծրագրում ներառված են՝

• Ադամանդի բնույթն ու ադամանդագործների չգրված օրենքներ
• Ալմաստների ֆիզիկա
• Ալմաստների ֆիզիկական բնութագրերը
• Ալմաստների բյուրեղաբանական համաչափությունը
• Ալմաստների օպտիկան
• Ալմաստների գույնն ու դրա բնույթը
• Ալմաստների սինթեզը (HPHT, CVD)
• Ալմաստների կազմավորումն ու հանքաարդյունահանումը
• Անմշակ ալմաստների տեխնոլոգիական հանքաբանությունն ու դասակարգումը
• Ադամանդի դասակարգումը
• Արհեստական և ազնվացված ադամանդներ

Հայտաձևն ու պահանջները առցանց առկա են, ինչպես նաև կարող են ներկայացվել AJF-ի միջոցով: Անհրաժեշտ է լրացված հայտը, երաշխավորող նամակն ու ռեզյումեն (ինքնակենսագրություն) ուղարկել Սփյուռքի նախարարության Եվրոպայի հայ համայնքների վարչության europedep@yahoo.fr էլ. հասցեին:

Լրացուցիչ տեղեկություններ ստանալու համար խնդրում ենք զանգահարել  Եվրոպայի հայ համայնքների վարչություն (37410) 58 56 01 (112) հեռախոսահամարով:

 ՀՀ ՍՓՅՈՒՌՔԻ ՆԱԽԱՐԱՐՈՒԹՅՈՒՆ