«Հայերն այսօր»-ի տեղեկացմամբ, մայիս 31-ին ՀՀ սփիւռքի նախարար Հրանոյշ Յակոբեան Պուէնոս Այրէսի մէջ մասնակցած է Հայ բժիշկներու միջազգային 12-րդ համագումարի (AMWC)  բացման hանդիսաւոր արարողութեան, որ կը նախագահէ արժանթինահայ ակնառու բժիշկ, վարակաբան Դանիէլ Ստամպուլեան:

ՀՀ սփիւռքի նախարարն իր ելոյթին մէջ կարեւոր համարած է համագումարի իրականացման գաղափարը` խորին երախտագիտութիւն յայտնելով ձեռնարկի կազմակերպիչներուն` ՖԱՅԴԷՔ հիմնադրամի, Ստամպուլեան հիմադրամի եւ ՊԼԱՍ-ի աշխատակազմերուն, եւ բոլոր անոնց, որոնք իրենց անգնահատելի լուման  ներդրած են այս գործին մէջ, յատկապէս` ՖԱՅԴԷՔ հիմնադրամի հիմնադիր-նախագահ Դանիէլ Ստամպուլեանին: Նախարարը նաեւ յոյս  յայտնած է, որ համագումարը կը համախմբէ աշխարհի հայ բժշկական ներուժն` ի նպաստ Հայաստանի առողջապահական համակարգի զարգացման:

«Հայաստանի Հանրապետութեան ազգային քաղաքականութեան առաջնահերթութիւնների մէջ իր իւրայատուկ եւ կարեւորագոյն տեղն է զբաղեցնում առողջապահութիւնը: Այս առումով ուզում եմ յատուկ կարեւորել «Առողջ Հայաստան» ծրագիրը, որի արդիւնաւէտ կեանքի կոչման գործում հնարաւոր չէ գերագնահատել Հայաստան-Սփիւռք-Արցախ եռամիասնութեանն ուղղուած միջոցառումների, այդ թւում` նաեւ աւանդոյթ դարձած այս միջազգային համագումարի դերակատարութիւնը»,-ըսած է ՀՀ սփիւռքի նախարար Հրանոյշ Յակոբեան` աւելցնելով, որ Պուէնոս Այրէսի մէջ Հայ բժիշկներու միջազգային համագումարի իրականացումը նշանակալից է նաեւ Արժանթին-Հայաստան համագործակցութեան ամրապնդման եւ զարգացման առումով:

Ողջունելով Հայաստանէն եւ աշխարհի տարբեր երկիրներէ Հարաւային Ամերիկա գտնուող հայ բժիշկները` Հրանոյշ Յակոբեան յաջող եւ արդիւնաւէտ ընթացք մաղթած է համագումարի աշխատանքներուն:

Աւելցնենք, որ Հայ բժիշկներու միջազգային 12-րդ համագումարը պիտի տեւէ  մինչեւ յունիս 2-ը: Առաջին համագումարը կայացած է Պէյրութ` 1974 թուականին, սփիւռքահայ բժիշկներու նախաձեռնութեամբ: Համագումարը կը կազմակերպուի աշխարհի տարբեր երկիրներու մէջ` 4 տարին անգամ մը: Այն կ’ընթանայ «Առողջութիւնը խթանելու, ընդելուզելու եւ նորամուծութեան մարտահրաւէրներ» նշանաբանի ներքոյ: