Ֆրանսայի Տիժոն քաղաքի «Մաշտոցեան տառեր» հայկական դպրոցի սաները եւ «Հայ պատանի» ակումբի երիտասարդները միացած են ՀՀ սփիւռքի նախարարութեան «Դուն ի՞նչ կ’ընես Ղարաբաղի համար» համահայկական շարժման:

«Արձագանքելով Սփիւռքի նախարարութեան կոչին` մենք եւս կը միանանք «Դուն ի՞նչ կ’ընես  Ղարաբաղի համար» համահայկական շարժման: Մեր դպրոցին մէջ իրականացուած ժողովին ընթացքին բոլորս եկանք համաձայնութեան, որ 2017 թուականին իրականացուող բոլոր ծրագիրներն ու ձեռնարկները կը նուիրուին Արցախին:

Մայիսին մենք ձեռնարկ մը  կազմակերպած էինք «Ես եմ Արցախը» խորագիրով, որ լուսաբանեց Տիժոնի «Պիեն փապլիք» թերթը: Ինչպէս այն ժամանակ, այնպէս ալ հիմա` թէ մեծերը, թէ փոքրերը պատրաստ են իրենց մասնակցութիւնը ունենալու բոլոր ձեռնարկներուն:

 «Դուն ի՞նչ կ’ընես Ղարաբաղի համար» համահայկական շարժման գաղափարը նոյնպէս շատ ոգեւորեց բոլորը: «Հայ պատանի»-ի ակումբի երիտասարդները իրենց ձեռագործ աշխատանքներու ցուցահանդէս-վաճառք պիտի կազմակերպեն: Ցուցահանդէսէն բացի պիտի կազմակերպուին բարեգործական ակցիաներ, որոնցմէ ստացուած ողջ հասոյթը պիտի  փոխանցուի Արցախի յատուկ դպրոցներ յաճախող երեխաներուն»,- «Հայերն այսօր»-ի հետ զրոյցին ըսած է հայկական համայնքի հիմնադիր եւ «Մաշտոցեան տառեր» հայկական դպրոցի տնօրէն Լիլիթ Բաղրամեան:

«Իմ կարծիքովս Արցախին նուիրուած որեւէ բան նախաձեռնելէ բացի` կրնանք նաեւ արցախցիներուն ընդգրկել մեր ձեռնարկներուն: Պատկերացուցէք` ինչ հաճելի ու հետաքրքիր կ’ըլլայ եթէ խումբ մը ղարաբաղցի եւ սփիւռքահայ երիտասարդներ միասին աշխատին  գաղափարի մը շուրջ եւ միասին իրագործեն որեւէ ծրագիր:

Հիմնական ծրագիրներէն մէկը նաեւ այն կ’ըլլայ, որ Տիժոն քաղաքին մէջ կը կազմակերպենք մեծամածաւալ ձեռնարկ, որուն մասնակից կ’ըլլան ոչ միայն հայ համայնքի, այլեւ` ուրիշ ազգերու ներկայացուցիչներ: Այդ ձեռնարկին ընթացքին կը ներկայացնենք Ղարաբաղի պատմութիւնն ու մշակոյթը»,-իր խօսքը եզրափակած է դպրոցի տնօրէնը: