ԱՄՆ-ի մէջ գործող Սուրիոյ հայ օգնութեան հիմնադրամը (SARF) 2016 թուականի Փետրուար 21-­ին Լոս Անճելըսի մէջ պիտի իրականացնէ հեռուստամարաթօն, որ պիտի ունենայ «Փրկէ կեանք» խորագիրը:

Հեռուստամարաթօնը նպատակ ունի սուրիական ճգնաժամի արդէն 5-­րդ տարուան օգնութեան ձեռք մեկնել Սուրիոյ մէջ բնակող հայերուն եւ անոնց համար յոյսի փոքր շող արթնցնել, կը հաղորդէ «Ասպարէզ»-­ը:

«Սուրիական հակամարտութեան արդէն 5­րդ տարին կը շարունակուին կործանիլ քաղաքներ ու գիւղեր, տուները կը հաւասարեցուին հողին, ընտանիքները կը մասնատուին, եւ որ ամենացաւալին է` արիւնահեղութիւնը կը շարունակուի, եւ անմեղ կեանքեր զոհ  կ’երթան բռնութեան: Հարիւր հազարաւոր քաղաքացիներ զրկուած են հիմնական կարիքներէն` ջուր, սնունդ, տանիք ու ջերմութիւն: Կոտորածները դարձուցած են մեր քաղաքացիներուն խիստ խոցելի: Հայկական սփիւռքի ամենահին համայնքներէն Հալէպը վերածուած է դատարկուած ուրուական քաղաքի: Անմարդկայնութեան ականատես ըլլալով, սակայն, մենք աւելի  կ’ուժեղացնենք մեր մարդկային յատկանիշները եւ կարիքի մէջ գտնուող անձանց օգնելու յանձնառութիւնը: Սուրիոյ մէջ մեր հայրենակիցները ամէն վայրկեան զոհուելու շեմին են ու, այդուհանդերձ, դեռ կը շարունակեն գոյատեւել»,­ կը նշուի Սուրիոյ հայ օգնութեան հիմնադրամի յայտարարութեան մէջ` յորդորելով բոլորին մասնակցիլ «Փրկէ կեանք» հեռուստամարաթօնին եւ օգնել բաւարարել Սուրիա բնակող մեր հայերնակիցներու ամենատարրական կարիքները, ինչպէս մէկ կտոր հացը, ջուրը կամ տաք հագուստը: