Հուլիսի 21-ին ՀՀ սփյուռքի նախարարության «Արի տուն» երիտասարդական հայրենաճանաչողական ծրագրի շրջանակներում 4-րդ փուլի մասնակիցները  եղան կապուտաչյա Սևանում:

Օրն ըստ ավանդույթի սկսվեց հայոց լեզվի դասընթացով,որի ավարտից հետո ծրագրի մասնակիցները ոգևորությամբ քննարկում էին դասը, կրկնում  նոր սովորած բառերն ու արտահայտությունները  և խորհրդակցում դասավանդողների հանձնարարած շարադրության թեմայի շուրջ:

 Օրվա հաջորդ երթուղին Երևանի կենդանաբանական այգին էր  ,  ուր աշխարհագրական տարբեր գոտիներից բերված  հետաքրքրաշարժ  կենդանիներից ու թռչուններից երեխաներին  առավել հետաքրքրեցին  մարդկանց շարժումները նմանակող կապիկները : Երևանյան  կիզիչ արևից հետո   իր զով գիրկն էր կանչում հրաշք Սևանը: Չնայած եղանակն այնքան էլ բարենպաստ չէր, սակայն արիտունցիները բարձրացան Սևանավանք ,  իրենց աղոթքը  հղեցին առ Աստված , հետո  բարձունքից զմայլվեցին շրջակա հիասքանչ տեսարաններով:

Անձրևային եղանակի պատճառով մասնակիցները մի փոքր տխրել էին, քանի որ չէին կարող լողալ: Սակայն եղանակը «բարի գտնվեց», և  քիչ  անց   արևի շողերը ողողեցին   լճի կապուտակ հայելին: Միմյանց ամբողջովին թրջելուց հետո «Արմենիա» պարային համույթը հենց լճի ափին կատարեց երկու պար, որոնք ավելի բարձրացրեցին  բոլորի տրամադրությունը:

Աբխազիայից Հայրենիք եկած 13-ամյա Կարինե Սուրմելեյանը, ով առաջին  անգամ է  Հայրենիքում, ամենքից շատ էր ոգևորված իր տեսածով ու զգացածով. հիացած էր թե՛ բնությամբ, թե՛ մարդկանցով: Նա հուզմունքով էր խոսում հատկապես Մատենադարանի  ու Էջմիածնի մասին՝ ասելով, որ դրանք  իր համար ամենատպավորիչ սրբավայրերն են  իրենց նշանակությամբ ու ճարտարապետությամբ:  Կարինեն խնդրեց մեր կայքի միջոցով իր երախտագիտությունը հայտնել Սփյուռքի նախարարաությանն ու իրեն հյուրընկալող ընտանիքին:

Մելինե  Հովհաննիսյան