ԳԼԵՆԴԵԼԻ ՆՈՐԸՆՏԻՐ ՔԱՂԱՔԱՊԵՏ

ՊԱՐՈՆ ԶԱՐԵՀ ՍԻՆԱՆՅԱՆԻՆ

Հարգելի՛ պարոն Սինանյան,

Ուրախությամբ տեղեկացանք, որ ստանձնել եք Գլենդելի քաղաքապետի պաշտոնը: Հպարտ ենք, որ ըստ արժանվույն են գնահատվել անվանի հայորդու, հարգված իրավաբանի և պետական գործչի ջանքները, ու քաղաքային խորհրդի փորձառու անդամներն իրենց վստահությունն են հայտնել Ձեզ` ընտրելով որպես Գլենդելի քաղաքապետ:

Վստահ ենք, որ Ձեր ուժն ու եռանդը կուղղեք Գլենդել քաղաքի զարգացմանը, բնակչության բարեկեցությանը և, մասնավորապես, հայերի համախմբմանը:

Ձեր կերպարը փայլուն օրինակ է աշխարհասփյուռ մեր հայրենակիցների և հատկապես երիտասարդների համար: Դուք ազատ և խստապահանջ հասարակության մեջ կարողացել եք Ձեր գաղափարներով, Ձեր հայացքներով ու մոտեցումներով արժանանալ մարդկանց և գործընկերների վստահությանը: Դուք Ձեր փորձը, գիտելիքները ներդնում եք կառուցողական ծրագրերի իրականացման համար, նպաստում Հայրենիքի, հայության և ԱՄՆ-ի ժողովուրդների բարեկամության խորացմանն ու զարգացմանը:

Մաղթում ենք Ձեզ անսպառ եռանդ և երկարամյա բեղուն գործունեություն՝ ի շահ հայ ժողովրդի ու Ամերիկայի հայ համայնքի և սիրով հրավիրում Ձեզ Հայաստանի Հանրապետություն՝ Ձեզ համար նախընտրելի ժամանակաշրջանում:

Հարգանքով՝

ՀՀ ՍՓՅՈՒՌՔԻ ՆԱԽԱՐԱՐԻ ՊԱՇՏՈՆԱԿԱՏԱՐ

ՀՐԱՆՈՒՇ ՀԱԿՈԲՅԱՆ