Հարգելի՛ պարոն Շխրտըմյան.

Ջերմ սիրով շնորհավորում եմ Ձեզ և ողջ խմբագրակազմին «Երեբունի» հայկական անկախ լրատուի 1-ամյա գործունեության առթիվ:

Այս կարճ ժամանակահատվածում օրաթերթը ոչ միայն հասցրեց լիարժեք կայանալ, այլև  Սփյուռքում բնակվող մեր հայրենակիցներին և ընդհանրապես հայությանն անաչառ և օբյեկտիվ լրատվություն տրամադրել՝ իրականացնելով իր առջև դրված մեկ հիմնական խնդիր՝ հայապահպանություն:

Յուրաքանչյուր հայատառ, առավել ևս արևմտահայերենով կամ դասական ուղղագրությամբ լույս տեսնող թերթ հայապահպանության մի փոքրիկ օազիս է աշխարհով մեկ սփռված հայկական համայնքներում:

Դուք, որպես «Արարատ» օրաթերթի նախկին պատասխանատու, ոլորտում ձեռք բերած Ձեր փորձառությունն ու հմտություններն ամբողջությամբ և մեծ նվիրումով դրսևորեցիք Ձեր իսկ կողմից հիմնած «Երեբունի» պարբերականում, ինչի շնորհիվ ընթերցողը ստացավ բազմակողմանի և առարկայական տեղեկատվություն: Հայկական մամուլում պարբերականը ուրույն դիմագիծ է ձեռք բերել՝ շնորհիվ Ձեր խմբագրականների,  Ձեր և մյուս լրատվամիջոցներին տրված տարաբնույթ հարցազրույցների:

Համացանցի երկդիմի գոյության և ազդեցության պայմաններում թերթը կարողացել է զանազանել կեղծը ճշմարիտից, զերծ մնալ ծայրահեղական դիրքորոշումներից, մատուցել հավասարակշռված լրատվություն՝ մշտապես ծառայելով Հայրենիք-Սփյուռք կապերի մերձեցման, հայության համախմբման գաղափարներին:

Թող տարիները «Yerepouni-news.com» պարբերականի համար դառնան լրատվական նորանոր հորիզոններ նվաճելու, Հայրենիք-Սփյուռք գործակցության մերձեցմանն ուղղված  ծրագրերի իրականացման  տարիներ:

Հայալեզու նորաստեղծ «Երեբունի» անկախ լրատուին մաղթում եմ կանաչ ճանապարհ և կայուն վերելք:

ՀԱՐԳԱՆՔՈՎ՝

ՀՐԱՆՈւՇ  ՀԱԿՈԲՅԱՆ