Հայոց ցեղասպանության 102-րդ տարելիցի կապակցությամբ Ավստրիայի մի շարք խոշոր քաղաքներում՝ Վիեննայում, Իննսբրուքում, Զալցբուրգում, Գրացում և Բադենում՝ Ցեղասպանության զոհերի հիշատակին նվիրված կոթողների, խաչքարների մոտ, տեղի ունեցան հիշատակի միջոցառումներ: Այս մասին «Հայերն այսօր»-ին հայտնում են ԱԳՆ մամուլի ծառայությունից:

Մայրաքաղաք Վիեեննայում հիշատակի միջոցառումները մեկնարկեցին ապրիլի 23-ին՝ Հայ առաքելական Սբ. Հռիփսիմե եկեղեցում մատուցած բարեխոսության կարգով: Այնուհետև եկեղեցուն կից սրահում տեղի ունեցավ գերմանացի գրող-սցենարիստ Թոմաս Հարդվիգի «Հայուհի» գրքի շնորհանդեսը, որին ավստրիահայ կազմակերպությունների ներկայացուցիչներից բացի մասնակցեցին ավստրիացի հասարակական գործիչներ, գրողներ, հրապարակախոսներ:

Ապրիլի 24-ին Վիեննայի կենտրոնական Շիլլեր հրապարակում տեղադրված ավստրիացի մեծ գրող և հումանիստ Ֆրանզ Վերֆելի հուշարձանի մոտ տեղի ունեցավ Հայոց ցեղասպանության զոհերի հիշատակին նվիրված արարողություն, որին, ի թիվս ավստրիահայ համայնքի բազմաթիվ ներկայացուցիչների, մասնակցեցին նաև ավստրիացի քաղաքական ու հասարակական գործիչներ, լրագրողներ:

Համատեղ աղոթքից հետո Ավստրիայի Հայ առաքելական եկեղեցական վարչության անունից ելույթ ունեցավ Վահագն Ամիրջանյանը: Ավստրիայում ՀՀ դեսպանության ներկայացուցչի կողմից ընթերցվեց ՀՀ Նախագահ Սերժ Սարգսյանի՝ Հայոց ցեղասպանության զոհերի հիշատակի օրվա առիթով հայրենակիցներին ուղղված ուղերձը:

Արարողությունն ուղեկցվեց «Անի» երգչախմբի երաժշտական կատարումներով, ասմունքով: Արարողության ավարտին Վերֆելի հուշարձանի մոտ զետեղվեցին պսակներ և ծաղիկներ:

Նույն օրը երեկոյան ավստրիահայ համայնքի կազմակերպությունների ներկայացուցիչները հրավիրվեցին Ավստրիայի Եվրոպայի, ինտեգրացիայի և արտաքին գործերի դաշնային նախարարություն, ուր ապրիլի 24-ի առթիվ նախարար Սեբաստիան Կուրցը հանդիպում և ընդունելություն էր կազմակերպել Ավստրիայի Հայ առաքելական համայնքի, ինչպես նաև Ավստրիայում բնակվող արևելյան քրիստոնեական մյուս համայնքների ներկայացուցիչների պատվին: