Հուլիսի 20-ին ՀՀ սփյուռքի նախարար Հրանուշ Հակոբյանն ընդունեց Շվեդիայի հայկական միությունների դաշնության նախագահ, Հայ դատի Շվեդիայի համադրող կենտրոնի ղեկավար Արշակ Գավաֆյանին:

Ողջունելով հյուրին՝ նախարարը բարձր գնահատեց  Հայ դատի կենտրոնի և հայկական միությունների դաշնության կողմից Շվեդիայի պետական-կառավարական մարմինների հետ ցեղասպանության ճանաչման և դատապարտման ուղղությամբ տարվող հետևողական աշխատանքները, ինչպես նաև Արցախյան քառօրյա պատերազմի օրերին իրականացրած բողոքի տարաբնույթ ակցիաները:

Անդրադառնալով համայնքին առնչվող խնդիրներին՝ Հրանուշ Հակոբյանը հորդորեց ուշադրությունը բևեռել հատկապես երիտասարդ սերնդին հասարակական կյանքում ներգրավելու և առաջ մղելու,  նախարարության ամառային ծրագրերին ավելի ակտիվ մասնակցություն ապահովելու և ազգային ինքնության գիտակցությունը բարձրացնող այլ հնարավորությունների ստեղծման վրա:

Զրույցի ընթացքում քննարկվեցին նաև շվեդահայ համայնքում Հայաստանի Հանրապետության անկախության 25-ամյակի միջոցառումները պատշաճ իրականացնելու նպատակով՝ Հայաստանի մշակութային գործիչների ներկայությունը ապահովելու հնարավորությունների հետ կապված հարցեր: