Յուլիս 20-ին ՀՀ սփիւռքի նախարար Հրանոյշ Յակոբեան ընդունեց Շուէտի հայկական միութիւններու դաշնութեան նախագահ, Հայ դատի Շուէտի համադրող կեդրոնի ղեկավար Արշակ Գաւաֆեանը:

Ողջունելով հիւրը` նախարարը բարձր գնահատեց  Հայ դատի կեդրոնի եւ հայկական միութիւններու դաշնութեան կողմէ Շուէտի պետական-կառավարական մարմիններուն հետ ցեղասպանութեան ճանաչման եւ դատապարտման ուղղութեամբ տարուող հետեւողական աշխատանքները, ինչպէս նաեւ Արցախեան քառօրեայ պատերազմի օրերուն իրականացուած բողոքի տարաբնոյթ ցոյցերը:

Անդրադառնալով համայնքին առնչուող խնդիրներուն` Հրանոյշ Յակոբեան յորդորեց ուշադրութիւնը բեւեռել յատկապէս երիտասարդ սերունդին հասարակական կեանքին ներգրաւելու եւ առաջ մղելու,  նախարարութեան ամառնային ծրագիրներուն աւելի աշխոյժ մասնակցութիւն ապահովելու եւ ազգային ինքնութեան գիտակցութիւնը բարձրացնող այլ հնարաւորութիւններու ստեղծման վրայ:

Զրոյցի ընթացքին քննարկուեցան նաեւ շուէտահայ համայնքէն ներս Հայաստանի Հանրապետութեան անկախութեան 25-ամեակի ձեռնարկները պատշաճ իրականացնելու նպատակով` Հայաստանի մշակութային գործիչներու ներկայութիւնը ապահովելու հնարաւորութիւններուն հետ կապուած հարցեր: