Արշալույս Երեմյանը Կրասնոդարի  Հայ Առաքելական Եկեղեցու Հարավային Ռուսաստանի Հայոց Թեմի Սուրբ Հովհաննես Ավետարանիչ եկեղեցուն կից գործող  «Արմատ» կիրակնօրյա դպրոցի և Պրիկուբանսկի մանկական ստեղծագործական կենտրոնի «Խաչքար» միավորման հայոց լեզվի ուսուցչուհին  է:

Տիկին Արշալույսն իր մասնակցությունն է բերել ՀՀ սփյուռքի նախարարության «Սփյուռք» ամառային դպրոցի սփյուռքի կրթօջախների ուսուցիչների վերապատրաստման  դասընթացներին:

«Խաչքար»  միավորումն  ունի  45  աշակերտ՝ կազմված տարբեր տարիքային  4  խմբից («Հայկ», «Հովհաննես  Թումանյան», «Արևիկ» և «Սասունցի Դավիթ»):

«Խաչքար»-ում  դասընթացներն  անցկացվում  են շաբաթվա բոլոր օրերին, բայց հիմնական դասերը լինում են շաբաթ  և  կիրակի  օրերին,  երկու հերթով  են  տեղի  ունենում՝ առավոտյան և ցերեկը: Երեխաները կարող են հաճախել դասընթացներին օրվա իրենց նախընտրելի ժամին. այդ առումով ազատ է գրաֆիկը:

Ուսուցչուհին նկատել է, որ Կրասնոդարում հայերենի հանդեպ մեծ հետաքրքրություն կա: Ծնողները երեխաներին հայերեն սովորեցնելու ուղղությամբ խանդավառ և պատրաստակամ են: Քաջ գիտակցում են, որ միայն այդ միջոցով կկարողանան իրենց զավակներին կապել Հայաստանին, որպեսզի չմոռանան իրենց հայ լինելը: Սաներին կրթօջախներում հայերեն ճիշտ խոսել, գրել-կարդալ են սովորեցնում, ինչպես նաև հայապահպան տարբեր տեղեկատվություններ հաղորդում: Ամբողջ դասաժամը կլանված են լսում սաները և ուսուցչուհուն խնդրում, որ իրենց հայերեն շատ բառեր սովորեցնի:

Միաժամանակ տարբեր տոների առթիվ՝ Ամանոր և Սուրբ Ծնունդ, Դպրության օր, Մայրենի լեզվի օր, Վարդավառ և այլն, գեղեցիկ միջոցառումներ են կազմակերպում, որոնք մեծ շուքով են տոնվում: Հատկապես Վարդավառի օրն է ուրախ անցնում:

Պարզվեց, որ Արշալույս Երեմյանը ՀՀ սփյուռքի նախարարության հետ սերտ համագործակցության մեջ է: 2012 թվականին տիկին Արշալույսը մասնակցել է ՀՀ սփյուռքի նախարարության, Համաշխարհային հայկական կոնգրեսի և Ռուսաստանի հայերի միության կողմից անցկացվող համահայկական մրցանակաբաշխությանը, որտեղ «Հայապահպանության գործում նշանակալի ավանդի համար» «Մայրենիի պաշտպան» ավանակարգում արժանացել է առաջին կարգի մրցանակի: Տիկին Արշալույսի աղջիկը՝ Գոհար Ալավերդյանը և աշակերտները գործուն մասնակցություն են ունենում ՀՀ սփյուռքի նախարարության ստեղծագործական շարադրությունների մրցույթներին և տարբեր մրցանակների արժանանում:

Իսկ «Սփյուռք» ամառային դպրոցի մասին նա դեռևս անցյալ տարիներին է իմացել, սակայն չի հաջողվել մասնակցել: Այս ծրագրին մասնակցելը իր համար կարևոր ձեռքբերում է համարում տիկին Արշալույսը: Շփվելով տարբեր երկրների մասնակից ուսուցիչների հետ՝ նոր մտքեր, գաղափարներ են ծնվում, որոնք հետագայում հնարավոր է, որ կյանքի կկոչվեն: Ասում է՝ այստեղ ազատ ժամանակ չեն ունենում, հագեցած է ամեն մի օրը, ինչից, բնավ, չեն դժգոհում: Շատ է հավանել էքսկուրսիաները Հայաստանի տարբեր տեսարժան վայրերում և հանդիպումներն անվանի մարդկանց հետ: Մեծ է եղել ուսուցչուհու հուզումը, երբ մեծատաղանդ դերասանուհի Վարդուհի Վարդերեսյանին է տեսել:

Վերջում Արշալույս Երեմյանը խորին  շնորհակալություն  հայտնեց  ՀՀ սփյուռքի  նախարարությանը` հանձին նախարար Հրանուշ Հակոբյանի  և   ՀՀ սփյուռքի  նախարարության Համահայկական ծրագրերի վարչության գիտակրթական ծրագրերի բաժնի պետ Սիրվարդ Համբարյանի՝ արդյունավետ դասընթացների, էքսկուրսիաների և բարեկամական  հարաբերությունների  համար:

 «Սփյուռք» ամառային դպրոցին մասնակցելն իրեն դրական լիցքեր հաղորդեց, որի շնորհիվ էլ վերադառնալով Կրասնոդար՝ կշարունակի եռանդով աշխատել և օտար ափերում գտնվող երեխաների մեջ տարածել հայ գիրն ու գրականությունը:

  Գևորգ Չիչյան