Արշալոյս Երեմեան Գրասնոտարի  Հայ Առաքելական Եկեղեցւոյ Հարաւային Ռուսաստանի Հայոց Թեմի սուրբ Յովհաննէս Աւետարանիչ եկեղեցւոյ կից գործող  «Արմատ» կիրակնօրեայ դպրոցի եւ Փրիկուբանսկի մանկական ստեղծագործական կեդրոնի «Խաչքար» միաւորման հայոց լեզուի ուսուցչուհին  է:

Տիկին Արշալոյսն իր մասնակցութիւնը  բերած է ՀՀ սփիւռքի նախարարութեան «Սփիւռք» ամառնային դպրոցի սփիւռքի կրթօճախներու ուսուցիչներու վերապատրաստման  դասընթացներուն:

«Խաչքար»  միաւորումն  ունի  45  աշակերտ` կազմուած տարբեր տարիքային 4  խումբերէ («Հայկ», «Յովհաննէս  Թումանեան», «Արեւիկ» եւ «Սասունցի Դաւիթ»):

«Խաչքար»-ի մէջ  դասընթացները  կ’իրականացուին շաբթուան բոլոր օրերուն, բայց հիմնական դասերը կ’ըլլան շաբաթ  եւ  կիրակի  օրերը,  երկու հերթով    տեղի  կ’ունենան` առաւօտեան եւ ցերեկը: Երեխաները կրնան  յաճախել դասընթացներուն օրուան իրենց նախընտրելի ժամուն. այդ առումով ազատ է ծրագիրը:

Ուսուցչուհին նկատած է, որ Գրասնոտարի մէջ հայերէնի հանդէպ մեծ հետաքրքրութիւն կայ: Ծնողները երեխաներուն հայերէն սորվեցնելու ուղղութեամբ խանդավառ եւ պատրաստակամ են: Քաջ կը գիտակցին, որ միայն այդ միջոցով պիտի կարենան իրենց զաւակները կապել Հայաստանին, որպէսզի չմոռնան իրենց հայ ըլլալը: Սաներուն կրթօճախներու մէջ հայերէն ճիշդ խօսիլ, գրել-կարդալ կը սորվեցնեն, ինչպէս նաեւ հայապահպան տարբեր տեղեկատուութիւններ կը հաղորդեն: Ամբողջ դասաժամը սաները կլանուած  մտիկ կ’ընեն եւ ուսուցչուհիէն կը խնդրեն, որ իրենց շատ հայերէն բառեր սորվեցնէ:

Միաժամանակ տարբեր տօներու առթիւ` Ամանոր եւ Սուրբ Ծնունդ, Դպրութեան օր, Մայրենի լեզուի օր, Վարդավառ եւ այլն, գեղեցիկ ձեռնարկներ կը կազմակերպեն, որոնք մեծ շուքով կը տօնուին: Յատկապէս Վարդավառի օրը շատ ուրախ կ’անցնի:

Պարզուեցաւ, որ Արշալոյս Երեմեան ՀՀ սփիւռքի նախարարութեան հետ սերտ համագործակցութեան մէջ է: 2012 թուականին տիկին Արշալոյսը մասնակցած է ՀՀ սփիւռքի նախարարութեան, Համաշխարհային հայկական կոնգրէսի եւ Ռուսաստանի հայերու միութեան կողմէ իրականացուող համահայկական մրցանակաբաշխութեան, ուր «Հայապահպանութեան գործին մէջ նշանակալի աւանդի համար» «Մայրենիի պաշտպան» անուանակարգին մէջ արժանացած է առաջին կարգի մրցանակի: Տիկին Արշալոյսի աղջիկը` Գոհար Ալաւերդեան եւ աշակերտները գործուն մասնակցութիւն կ’ունենան ՀՀ սփիւռքի նախարարութեան ստեղծագործական շարադրութիւններու մրցոյթներուն եւ տարբեր մրցանակներու կ’արժանանան:

Իսկ «Սփիւռք» ամառնային դպրոցի մասին ան դեռեւս անցեալ տարիներուն լսած է, սակայն չէ կրցած մասնակցիլ: Այս ծրագիրին մասնակցիլը իրեն համար կարեւոր ձեռքբերում կը համարուէ տիկին Արշալոյս: Ծանօթանալով տարբեր երկիրներու մասնակից ուսուցիչներու հետ` նոր միտքեր, գաղափարներ կը ծնին, որոնք յետագային հնարաւոր է, որ կեանքի  կոչուին: Կ’ըսէ` այստեղ ազատ ժամանակ չեն ունենար, յագեցած է ամէն մէկ օրը, որմէ, բնաւ, չեն դժգոհիր: Շատ հաւնած է շրջագայութիւնները Հայաստանի տարբեր տեսարժան վայրերու մէջ եւ հանդիպումներն անուանի մարդոց հետ: Մեծ եղած է ուսուցչուհիին յուզումը, երբ տեսած է մեծատաղանդ դերասանուհի Վարդուհի Վարդերեսեանին  :

Վերջաւորութեան Արշալոյս Երեմեան խորին  շնորհակալութիւն  յայտնեց  ՀՀ սփիւռքի  նախարարութեան` յանձին նախարար Հրանուշ Յակոբեանին  եւ   ՀՀ սփիւռքի  նախարարութեան Համահայկական ծրագիրներու վարչութեան գիտակրթական ծրագիրներու բաժինի պետ Սիրվարդ Համբարեանին` արդիւնաւէտ դասընթացներուն, շրջագայութիւններուն եւ բարեկամական յարաբերութիւններուն համար:

 «Սփիւռք» ամառնային դպրոցին մասնակցիլը իրեն դրական լիցքեր հաղորդեց, որուն շնորհիւ ալ վերադառնալով Գրասնոտար` պիտի շարունակէ եռանդով աշխատիլ եւ օտար ափերու վրայ գտնուող երեխաներուն մէջ տարածել հայ գիրն ու գրականութիւնը:

Գէորգ Չիչեան