Խոր ցավով տեղեկացա ՀՀ վաստակավոր ճարտարապետ Ջիմ Թորոսյանի մահվան մասին: Խնդրում եմ ընդունեք իմ անկեղծ և սրտակից ցավակցությունները:

Անդառնալի այս կորստի դժվարին պահին խորապես կիսում եմ Թորոսյան ընտանիքի վիշտը, որն իրականում համայն հայության վիշտն է:

Ջիմ Թորոսյանը հայ ժողովրդի տաղանդն ու մեծությունը մարմնավորող այն անձն էր, որն իր ողջ կյանքը նվիրաբերեց արվեստին և ձևավորեց իր՝ թորոսյանական դպրոցը:

Նրա ստեղծագործությունները նոր բարձրության հասցրին հայ ճարտարապետությունը՝ հպարտության զգացում ծնելով Հայրենիքում և Սփյուռքում ապրող մեր հայրենակիցների սրտերում:

Ի դեմս Ջիմ Թորոսյանի՝ նրան ճանաչող յուրաքանչյուրս նախ և առաջ կորցրեց գեղեցիկ ներաշխարհ, ճարտարապետական բարձր ճաշակ ունեցող արվեստագետի, ընկերոջ, բարեկամի, հարազատի, պարզապես բարի մի մարդու, որի բացակայությունը զգացվելու է անընդհատ:

Ջիմ Թորոսյանի անունն ու հիշատակը միշտ վառ է մնալու նրան ճանաչողների հիշողություններում:

ՀՐԱՆՈՒՇ ՀԱԿՈԲՅԱՆ