ՀՀ սփյուռքի նախարար Հրանուշ Հակոբյանն ընդունեց Պորտուգալիա-Հայաստան բարեկամության միության նախագահ Վահե Մխիթարյանին:

Ջերմորեն ողջունելով հյուրին՝ նախարարն իր գոհունակությունը հայտնեց փոքրաթիվ, բայց նախաձեռնող, ակտիվ համայնքի գործունեության վերաբերյալ և կարևորեց Հայաստանի և Պորտուգալիայի միջև հարաբերությունների զարգացմանն ուղղված համայնքի ջանքերը:

Նախարար Հրանուշ Հակոբյանը հորդորեց ներկայացնել Հայաստանի զբոսաշրջային գրավչությունը և նպաստել երկու ժողովուրդների փոխճանաչողությանը:

Վահե Մխիթարյանը շնորհակալություն հայտնեց ջերմ ընդունելության համար և նշեց, որ միությունը ստեղծվել է մեկ տարի առաջ և հիմնականում մշակութային ուղղվածություն ունի, այն ակտիվորեն համագործակցում է Սփյուռքի նախարարության հետ:

Առաջիկայում նախաձեռնել են Պորտուգալիայում կազմկերպել հայ մշակույթի շաբաթ, տարվում են նախապատրաստական աշխատանքներ: