ՀՀ սփյուռքի նախարար Հրանուշ Հակոբյանի այցը ԱՄՆ Արևելյան Հայոց թեմ

Ապրիլի 1-ին աշխատանքային այցով Նյու Յորքում գտնվող ՀՀ սփյուռքի նախարար Հրանուշ Հակոբյանն այցելել է ԱՄՆ Արևելյան Հայոց թեմի Առաջնորդարան, որտեղ նրան ընդունել է Թեմի առաջնորդ Տեր Խաժակ արքեպիսկոպոս Պարսամյանը: Հանդիպմանը ներկան են եղել Առաջնորդարանի վարիչ Արմեն Բայրբությանը, Հայ օգնության ֆոնդի Նյու Յորքի գրասենյակի տնօրեն Գառնիկ Նանագուլյանը և Առաջնորդական փոխանորդ Հայր Սիմեոն Օդաբաշյանը:
Հանդիպման մասին «Հայերն այսօրի» թղթակցին մանրամասներ է հաղորդել Արևելյան Հայոց թեմի առաջնորդ Տեր Խաժակ արքեպիսկոպոս Պարսամյանը:
Հանդիպման սկզբում Սրբազան Հայրը Սփյուռքի նախարար Հրանուշ Հակոբյանին ներկայացրել է Հայոց ցեղասպանության 100-րդ տարելիցի միջոցառումների շրջանակում ԱՄՆ Արևելյան Հայոց թեմի կատարած աշխատանքները և մանրամասնել այն բոլոր ձեռնարկները, որոնք իրականացվել են սիրիահայերին օժանդակելու ուղղությամբ:
Ողջունելով ներկաներին՝ Հրանուշ Հակոբյանը խոսել է ՀՀ սփյուռքի նախարարության կողմից իրականացվող ճանաչողական, գիտակրթական, մշակութային ուղղվածության ծրագրերի մասին և կոչ արել, որ համայնքը նույնպես ակտիվորեն մասնակցի դրանց: Այնուհետև նախարարը հանգամանալից ներկայացրել է Հայաստանում հաստատված սիրիահայերին ցուցաբերած բոլոր օժանդակությունները, որոնք իրականացնում է ՀՀ կառավարությունը:
«Գործնական առումով շատ արդյունավետ հանդիպում էր. տարբեր հարցերի շուրջ քննարկումներ ծավալեցինք, հետագա համագործակցության մտքեր փոխանակեցինք, որոնց իրականացմանը երկուստեք պատրաստակամություն հայտնեցինք հետամուտ լինել,- «Հայերն այսօրի» հետ զրույցում ասաց Սրբազան Հայրը և հավելեց,- Նախարար Հրանուշ Հակոբյանն ասաց, որ Առաջնորդարանում այնքան ջերմ մթնոլորտ է տիրում, որ կարծես իր տան մեջ լինի: Եվ դա իսկապես այդպես է, քանի որ Առաջնորդարանը համայն հայության տունն է»:

23

Scroll Up