Սփիւռքի նախարար Հրանոյշ Յակոբեան բարձր կը գնահատէ մամուլի դերը Հայրենիք-Սփիւռք կապերու ամրապնդման գործին մէջ: Այս մասին նախարարը խօսեցաւ Արաբական Միացեալ Էմիրութիւններու մէջ գործող հայկական «Այգ» առցանց ձայնասփիւռի հիմնադիր-ղեկավար Շաքէ Մանկասարեանին շնորհած «Մայրենիի դեսպան» մետալի յանձնման արարողութեան ժամանակ: Մետալը շնորհուած էր դեռեւս ՀՀ սփիւռքի նախարարի 14.09.2016թ հրամանով, սակայն այսօր հոկտեմբեր 26-ին նախարարը անձամբ շնորհեց մետալը:

Շնորհակալութիւն յայտնելով Շաքէ Մանկասարեանին կատարած մեծածաւալ հայապահպան աշխատանքին համար` նախարար Յակոբեան յոյս յայտնեց, որ այդ աշխատանքը շարունակական  կ’ըլլայ եւ նոր շունչ կը հաղորդէ հայապահանութեան ոչ միայն ԱՄԷ-ի մէջ, այլեւ բոլոր այն հայկական համայնքներուն մէջ, ուր կը հնչէ «Այգ»-ը: «Արդէն ութ տարի է, ինչ Շաքէ Մանկասարեանը նուիրումով ու սիրով ներկայացնում է  ազգային արժէքները: Ոլորտի մասնագէտներըկը հաստատեն, որ 24-ժամեայ անընդմէջ եթեր ապահովելը հեշտ գործ չէ, իսկ Շաքէն կարողանում է իրականացնել իր առաքելութիւնը  միայնակ, անշահախնդիր»-նշեց Սփիւռքի նախարարը:

Հանդիպման ընթացքին  Շաքէ Մանկասարեանի մասնագիտական վարպետութեան, բազմակողմանի գիտելիքներու, լրագրողական հմտութիւններու մասին խօսեցաւ լրագրող Արփէն Մովսիսեան:

Հայաստանի հանրային ձայնասփիւռի հասարակական հաղորդումներու ղեկավար Ռուզան Առաքէլեան, բարձր գնահատելով Շաքէ Մանկասարեանի  մարդկային բարձր որակները, նշեց, որ երկու կայանները արդէն հինգ տարի է կը համագործակցին եւ ամէն ուրբաթ Շաքէի ազդեցիկ խօսքն ու ուղերձները կը տարածուին Հանրային ձայնասփիւռի եթերով:

Շաքէ Մանկասարեանի գործունէութեան ու անհատականութեան անդրադարձան  թաւջութակահար Մետէա Աբրահամեան, լեզուաբան Յակոբ Չոլաքեան եւ արուեստագէտ Հրազդան Թոքմաջեան:

Շաքէ Մանկասարեան շնորհակալութիւն յայտնեց բարձր պարգեւի համար, նշեց, որ Ռատիօ «Այգ»-ի եթերները կ’ընդգրկեն սփիւռքեան եւ հայաստանեան լրատուութիւն, քաղաքական, հոգեւոր  թեմաներով հաղորդումներ` Աւետարանի մեկնութիւն, Սուրբ Պատարագի հեռարձակում, մշակութային հաղորդումներ, հարցազրոյցներ, իսկ երաժշտական կատարումներէն մեծ տեղ կը յատկացուի ազգային երգարուեստին` ժողովրդական, աշուղական, գուսանական երգերուն, կը հեռարձակուի նաեւ դասական երաժշտութիւն:

«Այգ»-ի հաղորդումները կը հեռարձակեն նաեւ «Երկիր Մետիա», «Արմէնիա» (ԱՄՆ-ի մէջ), «Կիլիկիա» հեռուստատեսութիւնները (Անթիլիաս Լիբանան), ինչպէս նաեւ  «Ասպարէզ», «Հորիզոն» թերթերու կայքերը:

Ան նշեց, որ Սփիւռքի մէջ չափազանց կարեւոր է հայրենի կառավարութեան եւ, մասնաւորապէս Սփիւռքի նախարարին կողմէ գնահատուած ու արժեւորուած ըլլալը, շնորհակալութիւն յայտնեց սերտ համագործակցութեան եւ այն անկեղծ ու հարազատ վերաբերմունքին համար, որ կը ցուցաբերեն նախարարը եւ նախարարութեան աշխատակիցները իւրաքանչիւր սփիւռքահայու հանդէպ: