Հոկտեմբեր 17-ին «Առնօ Բաբաջանեան» համերգասրահին մէջ, ՀՀ սփիւռքի նախարարութեան նախաձեռնութեամբ, կայացաւ Պոլսոյ «Մարմարա» օրաթերթի փոխխմբագիր, «Սուրբ Փրկիչ» ամսաթերթի խմբագիր, թարգմանիչ, վաստակաշատ մանկավարժ Մաքրուհի Յակոբեանի «Անվերջակէտ զրոյց` մեր գրականութեան երախտաւորներուն հետ» գիրքի շնորհանդէսը:

Բացման խօսքով հանդէս եկաւ ՀՀ սփիւռքի նախարարի տեղակալ Սերժ Սրապիոնեան: Բարձր գնահատելով վաստակաշատ խմբագիրի գործը` ՀՀ սփիւռքի նախարարի տեղակալը նշեց. «Մաքրուհի Յակոբեանի այս աշխատութիւնը նահանջի իւրօրինակ ահազանգ է, հանրութեան ուշադրութիւնը անհետացող պոլսահայ սերնդի վրայ բեւեռելու նշանակալի եւ հիմնարար գործ»: Պարոն Սրապիոնեան աւելցուց, որ ՀՀ սփիւռքի նախարար Հրանոյշ Յակոբեան մշտապէս բարձր կը գնահատէ Մաքրուհի Յակոբեանի` պոլսահայ համայնքի շնորհաշատ արուեստագէտները Հայրենիքի մէջ ներկայացնելու ջանքերը: «Շնորհիւ Ձեր նման ազգանուէր հայերի` համոզուած եմ, պոլսահայ գրական եւ մշակութային կեանքը ունենալու է արժանի փոխարինողների սերունդ», – եզրափակեց ՀՀ սփիւռքի նախարարի տեղակալը:

Հայաստանի գրողներու միութեան նախագահի պաշտօնակատար Էդուարդ Միլիտօնեան կարեւոր նկատեց համայնքէն ներս ստեղծուող հայ մշակոյթը տարածելու Մարքուհի Յակոբեանի ջանքերը:

Լրագրողներու միութեան նախագահ Աստղիկ Գէորգեան առանձնացուց խմբագիր Մաքրուհի Յակոբեանի` արեւմտահայերէնի բացառիկ իմացութիւնը: Հայերէնի վտանգուած այս ճիւղով լոյս տեսած հարցազրոյցներու ժողովածոն, որ նախ եւ առաջ համայնքի եւ այնտեղ ապրած մարդոց կեանքի վաւերագրութիւն է, փաստագրական լուրջ արժէք է յետագայ ուսումնասիրողներու համար:

Բարձր գնահատելով հեղինակի նուիրումն ու հաւատարմութիւնը խմբագիրի գործին եւ հայ գրականութեան` Ա. Գէորգեան Մ. Յակոբեանին պարգեւատրեց Հայաստանի Լրագողներու միութեան մետալով:

Խ. Աբովեանի անուան ԵՊՄՀ Հայ նոր եւ նորագոյն գրականութեան ամպիոնի վարիչ, բ.գ.դ., փրոֆէսոր Սուրէն Դանիէլեան նշեց, որ «Անվերջակէտ զրոյց…»-ով Մ. Յակոբեան կ’ամբողջացնէ եւ յայտարարի կը բերէ Պոլսոյ մէջ ստեղծուած 50 տարիներու ստեղծագործական վաստակը:

Ներկաները ողջունեց եւ օրհնանքի խօսք ըսաւ «Սահակեան» երգչախումբի դպրաց դասի ատենապետ Հ. Զաքէոս ծ. վրդ. Օհանեան:

Զեկուցումներով հանդէս եկան «Սփիւռք» գիտաուսումնական կեդրոնի մեթոտիսդ Ք.Աբրահամեան, թատերագէտ Լ.Մութաֆեան, ՀՀ սփիւռքի նախարարութեան աշխատակից Լ.Դամիրեան եւ այլք:

Ձեռնարկին գեղարուեստական բաժինին մէջ հանդէս եկաւ Պոլսոյ «Սահակեան» երգչախումբը` խմբավար Սեւան Ակօշեանի խմբավարութեամբ: