ՀՀ սփիւռքի նախարար Հրանոյշ Յակոբեան ընդունեց Հայաստանեայց Առաքելական Սուրբ Եկեղեցւոյ Ֆրանսայի թեմի առաջնորդ Գերաշնորհ Տէր Վահան եպիսկոպոս Յովհաննիսեանը, ֆրանսահայ գործարար, բարերար Ռեմի Մակինաճեանը եւ ֆրանսացի նշանաւոր բեմադրիչ Ատել Աւարտին:

Ջերմօրէն ողջունելով հիւրերը` նախարարը կարեւոր համարեց անոնց ազգանպաստ գործունէութիւնը եւ համայնքի ու եկեղեցւոյ դերակատարութիւնը Ֆրանսայի մէջ տեղի ունեցող հայանպաստ զարգացումներուն:

Նախարարն առանձնակի ոգեւորութեամբ ողջունեց ֆրանսահայ բարերար Ռեմի Մակինաճեանի` Հայաստանի եւ Ֆրանսայի հայ համայնքի մասին ֆիլմ նկարահանելու նախաձեռնութիւնը:

Շնորհակալութիւն յայտնելով ջերմ ընդունելութեան համար` Ռեմի Մակինաճեան կարեւոր համարեց Սփիւռքի նախարարութեան հետ համագործակցութիւնը եւ Հայաստանի զարգացման Սփիւռքի գործարարներու աշխոյժ մասնակցութիւնը: Ան ներկայացուց նշանաւոր բեմադրիչ Ատել Աւարտին, որ հայկական արմատներ ունի եւ հետաքրքրուած է Հայաստանով ու հայ մշակոյթով, ֆիլմի նկարահանումները սկսելէ առաջ ան եկած է տեսնելու եւ ընկալելու Հայաստան աշխարհը եւ խորապէս տպաւորուած է, արդէն ինքզինքը հայ  կը զգայ:

Քննարկուեցան Ֆրանսայի հայկական համայնքային կառոյցներուն եւ Հայաստան-Սփիւռք 6-րդ համաժողովին համայնքի մասնակցութեան առնչուող հարցեր: