Մայիս 6-ին  Քորթոպա  քաղաքին մէջ ՀՀ սփիւռքի նախարարութեան  «Դուն ինչ կ’ընես Արցախի համար» համահայկական շարժման ծիրէն ներս պիտի կայանայ ՀԲԸՄ-ի Արժանթինի մասնաճիւղի նախաձեռնած համերգարշաւը:

«Հայերն այսօր»-ի փոխանցմամբ` երաժշտական կատարումներով հանդէս պիտի գան «YANNI» նուագախումբի ջութակահար Սամուէլ Երուինեան, արժանթինաբնակ երաժիշտ, ՀԲԸՄ-ի Արժանթինի մասնաճիւղի պատուաւոր անդամ Գագիկ Գասպարեան, դաշնակահար Արմէն Կուզիկեան եւ Քորթոպայի մէջ գործող «Արարատ» հայկական պարախումբը:

Աւելցնենք, որ  համերգաշարի մեկնարկը պիտի տրուի մայիս 4-ին` Պուէնոս Այրէսի մէջ:

Նախատեսուած է համերգներէն գոյացած ողջ հասոյթով երաժշտական գործիքներ գնել Արցախի երաժշտական դպրոցներուն համար: Համերգները, որոնց նպատակը նաեւ Արցախը օտարազգիներու մօտ ճանաչելի դարձնելն է, պիտի կազմակերպուին Արժանթինի  շարք մը քաղաքներու մէջ, նաեւ` Պրազիլիոյ: Հարաւային Ամերիկայի մէջ իրականացուող ձեռնարկները պիտի ամփոփուին Հայաստանի եւ Արցախի մէջ` սեպտեմբեր ամսուն:

Համերգներու գեղարուեստական ղեկավար նշանակուած է Գագիկ Գասպարեան, իսկ ընդհանուր պատասխանատու` ՀԲԸՄ կեդրոնական վարչութեան պատուաւոր անդամ Անթոնիօ Սարաֆեան: