Օգոստոս 9-ին ՀՀ սփիւռքի նախարար Հրանոյշ Յակոբեան ընդունեց Մեծ Բրիտանիոյ Հայոց թեմի առաջնորդ Տ. Յովակիմ եպիսկոպոս Մանուկեանը: Հանդիպման ներկայ էին բրիտանահայ բարերար Րաֆֆի Դանիէլեան եւ Մեծ Բրիտանիոյ ՀՕՄ-ի շրջանային վարչութեան ատենապետուհի Արշալոյս Պապոյեան:

 Ողջունելով հիւրերը` նախարարը բարձր գնահատեց Տ. Յովակիմ եպիսկոպոս Մանուկեանի գործունէութիւնը:

Հոգեւոր առաջնորդը ներկայացուց  բրիտանահայ բարերար Րաֆֆի Դանիէլեանին եւ Մեծ Բրիտանիոյ ՀՕՄ-ի շրջանային վարչութեան ատենապետուհի Արշալոյս Պապոյեանին եւ համայնքէն ներս իրականացուած աշխատանքները:

 Նախարարը հիւրերուն ներկայացուց նախարարութեան ծրագիրները` շեշտելով Մեծ Բրիտանիոյ հայ համայնքի մասնակցութեան անհրաժեշտութիւնը յատկապէս «Արի տուն», «Իմ Հայաստան», «Սփիւռք» ամառնային դպրոց ծրագիրներուն:

 Տ.Յովակիմ եպիսկոպոս Մանուկեան եւս կարեւոր համարեց ՀՀ սփիւռքի նախարարութեան հետ համագործակցութիւնը:

Քննարկուեցաւ արաբ լրագրողներ Մարիամ Զաքիի եւ Մուհամետ Հանասիի նկարահանած «Ո՞վ սպաննեց հայերը» վաւերագրական ֆիլմի ցուցադրութիւնը եւ Հայաստանի արուեստագէտներու համերգները Մեծ Բրիտանիոյ մէջ կազմակերպելու  հետ կապուած հարցեր:

 Հանդիպման աւարտին հիւրերը շնորհակալութիւն յայտնեցին Սփիւռքի նախարարին ջերմ ընդունելութեան համար եւ իրենց պատրաստակամութիւնը յայտնեցին յառաջիկային առաւել արդիւնաւէտ համագործակցելու վերաբերեալ: