Դամասկոսի մէջ «Ազդակ»-ի թղթակիցը հաղորդեց, որ հրասանդի հրթիռի հարուած մը կրկին դամասկահայ զոհ մը խլեց:

Շաբաթ առաւօտեան Դամասկոսի կեդրոնը Ապետ պողոտայի վերջաւորութեան «Տար Աս Սալամ» դպրոցին դիմաց հրասանդի հրթիռի հարուած մը պատճառեց երկու զոհ, քանի մը վիրաւոր եւ նիւթական վնասներ: Հրթիռի բեկորի հարուածի պատճառով զոհուած է նաեւ 1944-ի ծնունդ դամասկահայ Նշան Մելիքեան, որ իր ակնոցի վաճառատան առջեւ կը գտնուէր:

Նշան Մելիքեան վարած էր միութենական աշխուժ կեանք, անդամ էր ՀՄԸՄ եւ Համազգային միութիւններուն: Ան ծառայած էր իբրեւ Համազգայինի «Լեւոն Շանթ» մասնաճիւղի վարչութեան անդամ եւ թատերական յանձնախումբի անդամ` ունենալով դերեր բազմաթիւ թատերական ներկայացումներու մէջ:

Նշենք, որ անցնող երկու օրերուն Դամասկոսի գրեթէ բոլոր շրջանները հրթիռարձակումի թիրախ էին, մանաւանդ Քասսա, Քուսուր, ԱպուՌումաննէ, Զապլաթանի, Ժարամանա եւ այլ խաղաղ թաղամասեր:

Միւս կողմէ, սուրիական բանակի միաւորներու եւ զինեալներու միջեւ բախումներ սաստկացած են մայրաքաղաքի արեւելեան մուտքի Քարաժաթ շրջանին մէջ եւ Հարաւային շրջաններէն Սպենէի եւ Հաժերայի մէջ:

Իսկ երէկ երեկոյեան ականուած երկու ինքնաշարժներ անձնասպանական գործողութեան իբրեւ արդիւնք պայթեցան Ումմայաներու հրապարակին վրայ` պատկերասփիւռի կայանի շէնքին մօտ` պատճառելով միայն նիւթական վնասներ:

 aztagdaily.com