Յուլիս 9-ին ՀՀ սփիւռքի նախարար Հրանոյշ Յակոբեան ընդունեց «Հայաստան» համահայկական հիմնադրամի Աւստրալիոյ մասնաճիւղի ներկայացուցիչ, Սփիւռք-Հայրենիք գործակցութեան համակարգող, Ռամկավար ազատական կուսակցութեան գործիչ Հայկ Լեփեճեանը:

Զրոյցի ընթացքին քննարկուեցան նախարարութեան աջակցութեամբ յառաջիկային աւստրալահայ համայնքէն ներս իրականացուելիք մշակութային ծրագիրներուն առնչուող հարցեր:

Պարոն Լեփեճեան տեղեկացուց, որ ընթացքի մէջ են  տիկին Յակոբեանի Աւստրալիա կատարած այցի ծիրէն ներս ձեռք բերուած պայմանաւորուածութիւններու իրականացումը: Սիտնէյի քաղաքապետարան արդէն իսկ տուած է իր համաձայնութիւնը`  Հայոց ցեղասպանութեան 100-րդ տարելիցի ձեռնարկներու ծիրէն ներս  Սիտնէյի մէջ հայկական խաչքար տեղադրելու նախագիծին, եւ շուտով խաչքարը Հայաստանէն կը տեղափոխուի Աւստրալիա:  Սիտնէյի եւ Երեւանի վարչական շրջաններու քոյր քաղաքներու ցանկը յառաջիկային կը համալրեն Նոր Նորքը եւ Վիլիւպան, իսկ աշնան տեղի կ’ունենան մշակութային  շարք մը կարեւոր ձեռնարկներ:

Հայկ Լեփեճեան պատմեց նաեւ «Հայաստան» համահայկական հիմնադրամի Աւստրալիոյ մասնաճիւղի միջոցներով Տաւուշի սահմանամերձ գիւղերուն մէջ  ջերմոցներու կառուցման աշխատանքներուն մասին, որուն նպատակն է գիւղացիներուն համար աշխատատեղերու ստեղծումը եւ արտագաղթի կանխումը:

Գոհունակութիւն յայտնելով իրականացուող ծրագիրներու վերաբերեալ`  նախարար Հրանոյշ Յակոբեան հաւաստիացուց, որ նախարարութիւնը պատրաստակամութիւն կը յայտնէ  իր հնարաւորութիւններու ծիրէն ներս  աջակցելու ատոնց իրականացման:

Քննարկուեցան նաեւ Սփիւռքի նախարարութեան ծրագիրներուն աւստրալահայ համայնքի մասնակցութեան առնչուող հարցեր: