ՀՀ սփյուռքի նախարար Հրանուշ Հակոբյանը կառավարության այսօրվա նիստում խոսելով գերատեսչության 2015 թվա­կանի «Սփյուռքի հայկական կրթական հաստատություններին ուսումնական գրականության և օժանդակ նյութերի մշակում և տրամադրում» ծրագրի կատարման մասին՝ նշեց, որ կբավարարվի Սփյուռքում գործող շուրջ 350 ամենօրյա և 600 մեկօրյա դպրոցների ուսումնական գրականության պահանջարկը:

 «Տրամադրվող գրականությունը մշակվել է ըստ համապատասխան երկրների, համայնքների, կրթօջախների առանձնահատկությունների, կրթական կարիքների բազմազանության, արևմտահայերեն խոսող սփյուռքահայ հատվածի պահանջների:

 Հատուկ ուշադրության կենտրոնում են հատկապես արևմտահայերեն դասագրքերի, ուսումնաօժանդակ նյութերի մշակման խնդիրները, գնալով ավելանում է սփյուռքին անհրաժեշտ մանկական գրականության, ազգային երգի ու պարի ձեռնարկների, ժամանակակից մեթոդական ու օժանդակ նյութերի, բառարանների, ինքնուսույցների, զրուցարանների պահանջարկը:

 Վերջին տարիներին ավելանում է գրականության ձեռքբերման խնդրով դիմող Սփյուռքի կրթական հաստատությունների, գրադարանների, ուսումնական, մշակութային, համայնքային կազմակերպությունների, այլ հաստատությունների թիվը, աճում է հայտերի և պահանջվող նյութերի թիվը, որը պայմանավորված է կրթական գործի կազմակերպման որակական փոփոխություններով, ինչպես նաև մեկօրյա դպրոցների ստեղծմամբ». հավելեց սփյուռքի նախարարը: