Սեպտեմբերի 24-ին ՀՀ սփյուռքի նախարար Հրանուշ Հակոբյանն ընդունեց ԱՄՆ-ից «Թեքեյան» մշակութային միության կենտրոնական վարչության գործադիր տնօրեն, «Արմինյն միրոր սփեքթեյթոր» շաբաթաթերթի թղթակից Պայծիկ Քալաջյանին և «Սփյուռքի ձայն» հեռուստաընկերության հաղորդավար լրագրող Մարիլինդա Պոզյան-Կրուկշանկին:

ՀՀ սփյուռքի նախարարը բարձր գնահատեց Ամերիկայի, Բեյրութի և Կիպրոսի հայ համայնքներում Պայծիկ Քալաջյանի մանկավարժական և լրագրողական երկարամյա աշխատանքը, որն իր անուրանալի նպաստն է բերել համայնքներում հայապահպանական գործին:

Նախարար Հրանուշ Հակոբյանը կարևորեց նաև ԱՄՆ-ի «Սփյուռքի ձայն» հեռուստաընկերության աշխատանքը, ինչպես նաև  լրագրող Մարիլինդա Պոզյան-Կրուկշանկի մասնակցությունը Հայրենիք-Սփյուռք 5-րդ համաժողովին:

Շնորհակալություն հայտնելով ՀՀ սփյուռքի նախարարությանը՝ «Հայրենիք-Սփյուռք» 5-րդ համաժողովը հավուր պատշաճի կազմակերպելու համար՝ Պայծիկ Քալաջյանը և Մարիլինդա Պոզյան-Կրուկշանկին հավաստիացրին, որ ամեն ջանք պիտի գործադրեն համաժողովում հնչած առաջարկություններից կազմված ծրագիրը համայնքում կյանքի կոչելու գործին աջակցելու համար:

Քննարկվեցին ամերիկահայ համայնքի  խնդիրներին, ինչպես նաև ՀՀ սփյուռքի նախարարության ծրագրերին, մասնավորապես երիտասարդների «Արի տուն» հայրենաճանաչության  ծրագրին առավել ակտիվ մասնակցելուն վերաբերող հարցեր: