ՀՀ սփյուռքի նախարարության «Արի տուն» ծրագրի 7-րդ փուլի մասնակիցների այցելությունները դեպի Հայաստանի պատմական վայրեր շարունակվում են: Օգոստոսի 14-ին  նրանք եղան Խոր Վիրապում և Նորավանքում:

«Հայերն այսօրը» ներկայացնում է նրանց  տպավորությունները.

Իլոնա Հայրապետյան, 15 տարեկան, Մոսկվա

«Հայաստանում եղել եմ, երբ շատ փոքր էի, բայց ոչինչ չեմ հիշում: «Արի տուն» ծրագիրը կարծես լավ առիթ եղավ՝  ևս մեկ անգամ Հայրենիք գալու  և ծանոթանալու մեր երկրին, ժողովրդին, պատմությանը: Չեմ կարող ինչ-որ վայր առանձնացնել, քանի որ չքնաղ է մեր Հայաստանը:

Ինձ շատ հետաքրքրեց Սուրբ Սարգսի պատմությունը, չեմ իմացել ոչինչ այդ պատմության մասին, ու հիմա, շնորհիվ այս ծրագրի, իմացա այդ և շատ այլ պատմություններ:

Հայկական ճաշատեսակներից նույնպես չեմ կարող առանձնացնել մեկը. շատ համեղ և բուրավետ է ամեն ինչ: Շատ շնորհակալ եմ Սփյուռքի նախարարությանը, որ այսպիսի ծրագրեր է կազմակերպում, մենք էլ գալիս ենք ու իմանում շատ մանրամասնություններ Հայաստանի վերաբերյալ: Ինքս շատ եմ ուզում գալ ու մշտապես այստեղ ապրել»:

Հովակիմյան Դավիթ, 15 տարեկան, Մոսկվա

            «Այս ծրագրով առաջին անգամ եմ լինում Հայաստանում, եկել եմ եղբորս հետ: Ամեն բան շատ եմ հավանում, քանի որ սա իմ Հայրենիքն է, ու դրանով ամեն բան ասված է: Ինչ կա այստեղ՝ մարդիկ, բնությունը, ամեն բան ուղղակի հրաշք է ու լավը:

Ճիշտն ասած, չեմ կարող ասել՝ կցանկանամ այստեղ մշտական ապրել, թե ոչ, քանի որ ինձ թվում է՝ պայմաններն այնքան էլ լավը չեն: Ու ես կրկին զարմացած եմ մեր ժողովրդի վրա, որ կարողանում է շատ դժվարություններ հաղթահարել, միշտ լավը տեսնել ու առաջ գնալ: Նրանք ևս մեկ անգամ ապացուցում են, որ հայերը միշտ էլ տարբերվել են մյուս ժողովուրդներից»:

Նարեկ Ջհանգիրյան, 15 տարեկան, Ուկրաինա

«Ծրագրին մասնակցում եմ եղբորս՝ Գրիշայի հետ: Հայաստանում երկրորդ անգամ եմ լինում: Այն, ինչ պատմում են մեզ մեր Հայրենիքի մասին, ոչինչ է կարծես, երբ գալիս և անձամբ ենք տեսնում. հրաշք բնություն, հրաշք մարդիկ: Սովորել եմ մեր պատմությունից շատ բաներ, տառերը, նոր բառեր:

Ամենակարևորը ձեռք եմ բերել նոր ընկերներ: Օրինակ՝ մեկ ընկերս ղարաբաղցի է, հիանալի անձնավորություն, փորձում եմ նաև իրենց բարբառով մի քանի բան սովորել: Մեզ մոտ՝ Ուկրաինայում, կա հայկական դպրոց, ու երբ գնամ արդեն այնտեղ, անպայման կգնամ այդ դպրոցը, որ շարունակեմ այստեղի սովորածս զարգացնել:»

Պատրաստեց   Մելինե Հովհաննիսյանը