«Արի տուն-2014» ծրագրի 7-րդ փուլի շրջանակներում Գառնի և Գեղարդ այցելելու ընթացքում արիտունցիներից մի քանիսը կիսվել են իրենց տպավորություններով, որոնք գրի է առել «Հայերն այսօրի» թղթակիցը:

Դիանա Մանթաշյան, Պյատիգորսկ

Հայաստան եկել եմ բարեկամներիս մոտ, բայց երբ իմացա այս ծրագրի մասին, անպայման ցանկացա մասնակցել: Շատ եմ ուզում Հայրենիքիս մասին ամեն ինչ իմանալ, տառերը սովորել, հայերեն գրել, կարդալ իմանալ: Հենց այդ պատճառով էլ որոշեցի մասնակցել այս  ծրագրին:

Առաջին անգամ Հայաստան եկա, երբ 5 տարեկան էի: Ոչինչ չեմ հիշում այն ժամանակից: Հիմա ինչ տեսնում ու լսում եմ նոր են ինձ համար և շատ հետաքրքիր: Առաջինը, ինչ ինձ զարմացրեց և ուրախացրեց, դա Երևանի փողոցներում հաճախակի հանդիպող «պուլպուլակներն» (ցայտաղբյուրներ) են. մեզ մոտ երբեք նման բան չէի տեսել: Հիացած եմ Կասկադով, շատ սիրուն է կառուցած, երբեք չեմ մոռանա»:

Մարիամ  Աճեմյան, Ռոստով

Չորս անգամ եղել եմ Հայաստանում, բայց անկեղծ ասած, գրեթե ոչինչ չեմ իմացել Հայրենիքիս, մեր պատմամշակութային կոթողների մասին:  Այս մի քանի օրերի ընթացքում որոշ չափով լրացրեցի այդ բացը: Ամեն բան այստեղ հարազատ է ու ջերմ: Չեմ կարող ինչ-որ բան առանձնացել. մարդիկ, բնությունը, ուտեստները՝ ամեն բան շատ լավն են:

Ռոնա Առուշանյան, Պյատիգորսկ

Երբ  իմացա «Արի տուն»  ծրագրի մասին, թե որքան շատ պատմամշակութային, տեսարժան վայրեր են այցելում մասնակիցները, ծանոթանում միմյանց հետ, որոշեցի ես էլ մասնակցեմ: Ամեն ինչ շատ հետաքրքիր է: Տպավորիչ էր հատկապես Սարդարապատի թանգարանը. այնտեղ գտնվող տարազներն ինքս էլ շատ կցանկանայի հագնել երբեմն: Հայկական ուտեստներից  միանշանակ կառանձնացնեմ տոլման:

 Շատ շնորհակալ եմ Սփյուռքի նախարարությանը, որ Հայրենիքը ճանաչելու այսպիսի հնարավորություն  մեզ տվեց:

Պատրաստեց   Մելինե Հովհաննիսյանը