Օրերս մեկնարկեց «Արի տուն-2014» ծրագրի  5-րդ փուլը: Այս փուլի հերթական շրջագայության ժամանակ «Հայերն այսօրի» թղթակիցը զրուցել է  Իսպանիայի Մադրիդ քաղաքից հայրենիք ժամանած քույրիկներ Քնարիկ և Լուիզա Գրիգորյանների հետ:

Աղջիկները ապրել են Հայաստանում, սակայն երբ Լուիզան 7, իսկ Քնարիկը 9 տարեկան էին, ընտանիքով մեկնել են Իսպանիա: Արդեն  չորրորդ անգամ են Հայստան գալիս, բայց առաջին անգամն է, որ մասնակցում են «Արի տուն» ծրագրին, որի մասին շատ անգամներ են լսել և միայն այս տարի որոշել մասնակցել:

Քույրիկները պատմեցին, որ շատ են սիրում Հայաստանը: Նրանց դուր են եկել հատկապես հայկական ուտելիքները: Քնարիկը  շատ է սիրում լոլիկ ուտել.  «Հայկական հողի բարիքներն ավելի համեղ են» ,- ասում է նա:

Լուիզան և Քնարիկը վստահեցնում են, որ  իրենց հայկական արմատները պահպանելու համար Իսպանիայում միշտ հայերեն են խոսում,  հայկական երաժշտություն  լսում, հայերեն գրքեր կարդում, հայալեզու ֆիլմեր դիտում, և հետևում  են հայակական բոլոր  ավանդույթներին: Նրանք հաճախել են նաև հայկական կիրակնօրյա դպրոց :

Քույրերը պատմեցին, որ արդեն երկու օր է՝  Հայաստանում են,  և այս օրերի ընթացքում այնքան շատ բան են տեսել ու սովորել, նոր ընկերների հետ ծանոթացել, հաճելի պահեր ապրել, որ  դժվար կլինի այս ամենը  թողնել ու գնալ Իսպանիա: Աղջիկները ասացին, որ կարոտելու են այս մեծ ընտանիքը:

Զրույցի վերջում էլ  քույրերը շնորհակալություն հայտնեցին ՀՀ սփյուռքի նախարարությանը՝ նման հնարավորություն ընձեռելու համար, իսկ օտարության մեջ ապրող իրենց հայրենակիցներին հրավիրեցին մասնակցելու «Արի տուն» ծրագրին:

Տաթև Դավթյան