ՀՀ սփյուռքի նախարարության «Իմ Հայաստան» համահայկական փառատոնի «Պարարվեստի օրեր»-ի փակման  հանդիսավոր արարողությունից հետո էլ շարունակվում են միջոցառումները: Կրասնոդարի Հայ Առաքելական Սուրբ Եկեղեցու ներքո գործող «Գրիգոր Նարեկացու» անվան կրթամշակութային  կենտրոնի «Նարեկ» պարային համույթը, կենտրոնի ղեկավար Ամալյա Մոսինյանի գլխավորությամբ, այցելեց  «Օրրան», որտեղ տեղի երեխաների և ծերերի համար հանդես եկան համերգային գեղեցիկ ծրագրով: Այս միջոցառման նախաձեռնողը Ամալյա Մոսինյանի մտերիմներից տիկին Սեդան է եղել, ով «Օրրան»-ում  է աշխատում: Խումբը սիրով  ընդունել է ելույթի հրավերը:

 Համերգային ծրագրից առաջ ողջույնի խոսքով հանդես եկավ Ամալյա Մոսինյանը. «Նախ ասեմ, որ մեզ համար  անչափ հաճելի է պարել ձեզ համար, հուզումով ենք եկել այստեղ: Իմացե՛ք, որ  օտար ափերում դուք մեր մի մասնիկն եք, մեր քույրերն ու եղբայրները»:          Պարային կատարումների ընթացքում երեխաները ակտիվորեն ծափահարում էին և ուշադիր հետևում պարուհիների շարժումներին: Իսկ համերգի վերջում «Միասնության շուրջպար» երգի ներքո բոլորը համախմբված պարեցին, լուսանկարվեցին և ուրախ տրամադրությամբ  հրաժեշտ տվեցին միմյանց:

Գևորգ   Չիչյան