ՍՎԵՏԼԱՆԱ ԳՐԻԳՈՐՅԱՆԻ ԸՆՏԱՆԻՔԻՆ, ԲԱՐԵԿԱՄՆԵՐԻՆ

Խոր ցավով տեղեկացանք սիրված դերասանուհի, ՀՀ ժողովրդական արտիստուհի, տաղանդավոր կատակերգու Սվետլանա Գրիգորյանի մահվան մասին:

Սվետլանա Գրիգորյանը հայ ժողովրդի դերասանական տաղանդն ու մեծությունը մարմնավորող այն անձանցից էր, ովքեր իրենց ողջ կյանքը նվիրաբերել են արվեստին` իրենց կերտած կերպարներով ներկայացնելով դերեր, որոնք ընդգծում են մարդու հոգեկան պոռթկումները, ոգևորումն ու հիասթափությունը, սերն ու ատելությունը, հավատն ու հուսահատությունը, սպասելիքն ու կորուստը, կարոտն ու հիացումը` կոմիկականի հանդերձանքով:

 Սվետլանա Գրիգորյանն իր ինքնատիպ խաղով թատրոն բերեց բոլորովին նոր տեսակ, նոր որակ, բացառիկ դերասանական հմայք ու վարպետություն` թատերական աշխարհի մեր անզուգական փաղանգում առանձնանալով և մնալով որպես վառ  անհատականություն, վառ կերպար, հանդիսատեսի ամենապաշտելի ու ամենասիրված դերասաններից մեկը:

Իրավամբ, Սվետլանա Գրիգորյանը «բացառիկ» է, ինչպես բնութագրել են նրան «Թատրոնի քրմուհի»,  «խելացի և ճշմարիտ դերասանուհի», «ծիծաղի թագուհի» և այլն: Դիպուկ են բոլորն էլ, բայց այս վերջինը, կարծում եմ, բովանդակում է նրա բեղուն ստեղծագործական անցած ճանապարհը, նրա իմաստավոր, բարձրակեցիկ գործունեությունը և որ ամենակարևորն է, հանդիսատեսի անսահման սերը:

 Հանդիսատեսը պաշտում է Սվետլանա Գրիգորյանին թե՛ Հայաստանում, թե՛ Սփյուռքում: Պատահական չէր, որ «ծիծաղի թագուհի» տիտղոսին նա արժանացել է հեռավոր Լոս Անջելեսում: Սա համայն հայության գնահատանքն ու երախտագիտությունն է Սվետլանա Գրիգորյանին` նրա տաղանդին, նրա ժառանգությանը և, իհարկե, նրա մարդկային նկարագրին:

ՀՀ սփյուռքի նախարարության ողջ անձնակազմը ցավակցում է Սվետլանա Գրիգորյանի ընտանիքին, բարեկամներին, ամբողջ հայ ժողովրդին այս անդառնալի կորստի կապակցությամբ:

ՀՀ ՍՓՅՈՒՌՔԻ ՆԱԽԱՐԱՐ

ՀՐԱՆՈՒՇ ՀԱԿՈԲՅԱՆ