Ռումինիայի Հայ դատի գրասենյակը Ռումինիայում հայ առաքելական եկեղեցու առաջնորդ, եպիսկոպոս Տաթեւ Հակոբյանի հետ համատեղ հանդիպում է ունեցել Շվեյցարիայի դեսպան Ժան-Յուբեր Լեբեի հետ: այդ մասին գրում է «Asbarez»-ը: Հանդիպման նպատակն էր դեսպանին հասցնել անհրաժեշտությունն այն մասին, որ Շվեյցարիայի կառավարությունը պետք է բողոքարկի Մարդու իրավունքների եվրոպական դատարանի որոշումը կապված թուրք քաղաքական գործիչ Դողու Փերինչեքի հետ:

Հանդիպման ընթացքում, որին ներկա էր նաեւ Ռումինիայի խորհրդարանի անդամ Վարուժան Փամբուկչյանը, կրկին քննարկվել է Հայոց ցեղասպանության ճանաչման ու դատապարտման կարեւորությունը: Մասնակիցներն իրենց բողոքն են արտահայտել ընդդեմ Փերինչեքի գործով կայացված որոշման: Մասնակիցների անհանգստությունները նամակի տեսքով փոխանցել են դեսպանին, ով իր մտահոգությունն է հայտնել տվյալ հարցի վերաբերյալ:

Հիշեցնենք, որ Մարդու իրավունքների եվրոպական դատարանը բավարարել է հակահայ թուրք գործիչ Դողու Փերինչեքի հայցն ընդդեմ Շվեյցարիայի՝ որոշումը հիմնավորելով խոսքի ազատության սկզբունքով: Թուրքիայի աշխատավորական կուսակցության նախագահ Դողու Փերինչեքը 2008թ.-ին Շվեյցարիայում դատապարտվել էր Հայոց ցեղասպանության հրապարակային ժխտման համար: