Հայկական բարեգործական ընդհանուր միության Բուենոս Այրեսի մասնաճյուղը նշել է հիմնադրման 106-րդ տարեդարձը:

«Հայերն այսօր»-ի փոխոնցմամբ, նոյեմբերի 5-ին կազմակերպված ճաշկերույթին ներկա են եղել Հայաստանյայց Առաքելական Սուրբ եկեղեցու Արգենտինայի և Չիլիի Հայոց թեմի առաջնորդ Գերաշնորհ Տեր Գիսակ արքեպիսկոպոս Մուրադյանը, Բուենոս Այրեսի Սուրբ Գրիգոր Լուսավորիչ հայկական եկեղեցու հոգևոր հովիվ Հոգեշնորհ Տեր Մաղաքիա վարդապետ Ամիրյանը և այլք, հոգևոր այլ այրեր, ինչպես նաև ՀԲԸՄ պատվավոր նախագահ Ռուբեն Քեշիշյանը, ատենապետ Ռուբեն Արթուրո Կետիկյանը, ՀԲԸՄ պատվո անդամ, ՀԲԸՄ Բուենոս Այրեսի մասնաճյուղի փոխատենապետ  Անտոնիո Սարաֆյանը, բարերարներ, միության ղեկավարներ, «Մարի Մանուկյան» վարժարանի ուսուցիչներ, աշակերտներ,  համայնքային ներկայացուցիչներ:

Երեկոյի ընթացքում տեղի է ունեցել պատվոգրերի հանձման արարողություն: ՀՀ սփյուռքի նախարարության «Դու ի՞նչ ես անում Արցախի համար» համահայկական շարժմանը գործուն մասնակցության համար ՀՀ սփյուռքի նախարարության պատվոգրով է պարգևատրվել միության Բուենոս Այրեսի մասնաճյուղի վարիչ-քարտուղար Աննա Կահվեջյանը, իսկ Հայկական գեղարվեստի հիմնադրամի պատվոգրերով արվեստագետներ Բեատրիս Մարկոսյանն ու Միրթա Քիրպասյանը, ովքեր իրենց աշխատանքները նվիրել էին  համահայկական շարժման շրջանակներում Երևանի պատմության թանգարանում կազմակերպված ցուցահանդես-աճուրդին:

Ամփոփելով «Դու ի՞նչ ես անում Արցախի համար» շարժման շրջանակներում միության կողմից կատարած աշխատանքները՝ Անտոնիո Սարաֆյանը նշել է, որ կայացած համերգների արդյունքում հանգանակված գումարով ձեռք են բերել 326 երաժշտական ​​գործիք, որոնք նվիրել են Հայաստանի և Արցախի սահմանամերձ բնակավայրերի երաժշտական դպրոցներին:

Տոնական տորթի խորհրդանշական կտրումը կատարել են միության պատվավոր նախագահ Ռուբեն Քեշիշյանը, Տիկնանց հանձնախմբի պատվավոր ատենապետ Պերճուհի Էմիրյանը, նախկին ատենապետներ Համբարձում Հալաջյանը և Խուան Ջռնազյանը:

Տոնական միջոցառման գեղարվեստական մասում ելույթ են ունեցել ՀԲԸՄ «Մարի Մանուկյան» կրթական հաստատության «Արամ Խաչատրյան» նվագախումբը՝ պրոֆեսոր Ֆլորենսիա Հալաջյանի ղեկավարությամբ, և երգիչ Արման Գասպարյանը: