Հայկական բարեգործական ընդհանուր միութեան Պուէնոս Այրէսի մասնաճիւղը նշած է հիմնադրման 106-րդ տարեդարձը:

«Հայերն այսօր»-ի փոխոնցմամբ, նոյեմբեր 5-ին կազմակերպուած ճաշկերոյթին ներկայ եղած են Հայաստանեայց Առաքելական Սուրբ եկեղեցւոյ Արժանթինի եւ Չիլիի Հայոց թեմի առաջնորդ Գերաշնորհ Տէր Գիսակ արքեպիսկոպոս Մուրադեան, Պուէնոս Այրէսի Սուրբ Գրիգոր Լուսաւորիչ հայկական եկեղեցւոյ հոգեւոր հովիւ Հոգեշնորհ Տէր Մաղաքիա վարդապետ Ամիրեան եւ այլք, հոգեւոր այլ այրեր, ինչպէս նաեւ ՀԲԸՄ պատուաւոր նախագահ Ռուբէն Քեշիշեան, ատենապետ Ռուբէն Արթուրօ Կէտիկեան, ՀԲԸՄ պատուոյ անդամ, ՀԲԸՄ Պուէնոս Այրէսի մասնաճիւղի փոխատենապետ  Անթոնիօ Սարաֆեան, բարերարներ, միութեան ղեկավարներ, «Մարի Մանուկեան» վարժարանի ուսուցիչներ, աշակերտներ,  համայնքային ներկայացուցիչներ:

Երեկոյի ընթացքին տեղի ունեցած է պատուոգիրներու յանձման արարողութիւն: ՀՀ սփիւռքի նախարարութեան «Դուն ի՞նչ կ’ընես Արցախի համար» համահայկական շարժման գործուն մասնակցութեան համար ՀՀ սփիւռքի նախարարութեան պատուոգիրով  պարգեւատրուած է միութեան Պուէնոս Այրէսի մասնաճիւղի վարիչ-քարտուղար Աննա Գահուեճեան, իսկ Հայկական գեղարուեստի հիմնադրամի պատուոգիրներով արուեստագէտներ Պէաթրիս Մարկոսեան ու Միրթա Քիրպասեան, որոնք իրենց աշխատանքները նուիրած էին  համահայկական շարժման ծիրէն ներս Երեւանի պատմութեան թանգարանին մէջ կազմակերպուած ցուցահանդէս-աճուրդին:

Ամփոփելով «Դուն ի՞նչ կ’ընես Արցախի համար» շարժման ծիրէն ներս միութեան կողմէ կատարած աշխատանքները` Անթոնիօ Սարաֆեան նշած է, որ կայացած համերգներու արդիւնքով հանգանակուած գումարով ձեռք  բերած են 326 երաժշտական ​​գործիք, որոնք նուիրած են Հայաստանի եւ Արցախի սահմանամերձ բնակավայրերու երաժշտական դպրոցներուն:

Տօնական կարկանդակի խորհրդանշական կտրումը կատարած են միութեան պատուաւոր նախագահ Ռուբէն Քեշիշեան, Տիկնանց յանձնախումբի պատուաւոր ատենապետ Պերճուհի Էմիրեան, նախկին ատենապետներ Համբարձում Հալաճեան եւ Խուան Ջռնազեան:

Տօնական ձեռնարկին գեղարուեստական մասին ելոյթ  ունեցած են ՀԲԸՄ «Մարի Մանուկեան» կրթական հաստատութեան «Արամ Խաչատրեան» նուագախումբը` փրոֆէսոր Ֆլորենսիա Հալաճեանի ղեկավարութեամբ, եւ երգիչ Արման Գասպարեան: