«Հայերն այսօրի» փոխանցմամբ՝ Հայ  բարեգործական ընդհանուր միության Բուենոս Այրեսի մասնաճյուղի «Մարի Մանուկյան» դպրոցի աշակերտները միացել եմ ՀՀ սփյուռքի նախարարության նախաձեռնած «Դու ի՞նչ ես անում Ղարաբաղի համար» համահայկական շարժմանը:

«Մարի Մանուկյան» դպրոցը Բուենոս Այրեսի յոթ հայկական դպրոցներից մեկն է:

Արդեն 35 տարի է, ինչ ձևավորված ավանդույթի համաձայն՝ դպրոցի ավարտական դասարանների հայ աշակերտները հատուկ ծրագրով գալիս են Հայաստանը տեսնելու:

Ավարտական դասարանների աշակերտները մեկ տարի շարունակ իրենց ծնողների հետ հայկական տարբեր կերակուրներ են պատրաստում և շաբաթվա կտրվածքով երկու անգամ՝ ուրբաթ-շաբաթ օրերին, այն վաճառում դպրոցի սրահներից մեկում, որը խորհրդանշական ձևով ռեստորանի են վերածում: Ճաշացանկը բաղկացած է լինում հիմնականում Կիլիկիան Հայաստանի ճաշատեսակներից՝ հումուս, թաբուլե, պասուց դոլմա և այլն: Հավաքված գումարով ամառային արձակուրդին նրանք Հայաստան են գալիս:

Ընդհանուր առմամբ՝ այս տարիների ընթացքում 6000 սփյուռքահայ պատանիներ և  աղջիկներ են եկել Հայաստան, եկել են տեսնելու իրենց պապերի ծննդավայրը: