ՀՀ սփյուռքի նախարարի տեղակալ Սերժ Սրապիոնյանն ընդունեց Դերսիմից «Արի տուն»  ծրագրի 6-րդ փուլի մասնակցած խմբին՝ Դերսիմի կազմակերպությունների միության նախագահ Ահմեդ Բալկիսի ղեկավարությամբ:

 Նրանք շնորհակալություն հայտնեցին Հայաստանի կառավարությանը և մասնավորապես սփյուռքի նախարարությանը, որ ընդառաջել են իրենց  ցանկությանը և կյանքի են կոչել Հայաստան այցելելու իրենց մեծ երազանքը:

 Խմբի ղեկավարն իր երախտագիտությունը հայտնեց ջերմ հյուրընկալության համար և նշեց, որ «Արի տունը»   բացառիկ ծրագիր է՝ հագեցած բազմաբովանդակ միջոցառումներով, հետաքրքիր շրջագայություններով ու ճամբարային օրերով: Խմբի բոլոր անդամներն ապրեցին անբացատրելի զգացողություններ ու անմոռանալի պահեր, ճանաչեցին Հայաստան աշխարհն ու հայ ժողովրդին: Նա մասնաորապես ասաց. «Պատմությունը միշտ ապացուցել է, որ պաշտոնական դիվանագիտությունից ավելի զորավոր է ժողովրդական դիվանագիտությունը: Միայն անմիջական շփումներով կարելի է ճանաչել միմյանց և հաստատել ու խորացնել հարաբերությունները ժողովուրդների միջև»:

 Բենիամին Հովհաննիսյանը, ով ժամանակին սովորել է Հայաստանում և աշխատել է հայկական ռադիոյում, նշեց, որ այս այցելությունը օգնեց իրենց ճանաչել սեփական արմատները, ծանոթանալ հայոց լեզվին և իրենց պապերի հավատքին, նա ասաց, որ «Արի տունը»   դեպի իրենց ինքնությունը վերադարձի մի հրաշալի ճանապարհ էր, անցյալն ու ներկան իրար կապող մի նոր կամուրջ:

 Նախարարի տեղակալ Սերժ Սրապիոնյանը հատուկ շնորհակալություն հայտնեց կանադահայ բարերար Ռաֆֆի Պետրոսյանին՝ Դերսիմից և Դիարբեքիրից իսլամացած հայերի ստվար խմբի մասնակցությունը ծրագրին հնարավոր դարձնելու համար և կարևորեց իսլամացած հայերի՝ իրենց ազգային արմատներին վերադառնալու շարժումը, որը պետք է գնալով նոր ընդգրկում ունենա:

 Հյուրերը նախարարությանը հանձնեցին խորհրդանշական նվեր: