Պատմում են արիտունցիները…

Արտաշ Խանոյան-Վրաստան, քաղաք Ախալցխա

 Խորին շնորհակալությունս եմ հայտնում ՀՀ սփյուռքի նախարարությանը հատկապես այն բանի համար, որ մեզ համար «Արի տուն» ծրագրի ընթացքում Հայոց լեզվի ուսուցման դասընթաց է կազմակերպել:

Շատ ուրախ եմ, որ հաճախեցի դասերին, որտեղ ուսուցչուհիները մեզ  տարբեր թեմաների միջոցով սովորեցրին Հայոց պատմությունը, Հայ գրականությունը, Հայ մշակույթ և հայրենաճանաչողական այլ առարկաներ:

Երախտապարտ եմ ուսուցչուհուս՝ տիկին Աբազյանին, բոլորիս հանդեպ ցուցաբերած ջերմ վերաբերմունքի համար:

Հարություն Մելքոնյան-ՌԴ, քաղաք Մոսկվա

Մոսկվայում ապրելուն հարմարվել եմ: Սակայն դա արգելք չի հանդիսանում, որ Հայաստան գալու մասին չմտածեմ: Միշտ հետաքրքրվում եմ Հայաստանում տեղի ունեցող իրադարձություններով, իսկ հարազատներիս հետ կապը պահպանում եմ: Տպավորված եմ Հայոց լեզվի դասընթացներից, որոնց մասնակցելու առիթ ունեցա՝ մասնակցելով «Արի տուն» ծրագրին:

 Գառնու հեթանոսական տաճար այցելության օրը երկար կպահպանվի հիշողությանս մեջ. ինձ համար ազդեցիկ էր այդ շինությունը:

Դավիթ Մելքոնյան –Վրաստան, քաղաք Ախալցխա

– «Արի տուն» ծրագրում ունեցած կարճ ժամանակահատվածում կարողացա ինձ համար շատ բացահայտումներ անել: Ամենակարևորը՝ կարողացա Հայաստանը լավ ճանաչել, տեսնել բոլոր տեսարժան վայրերը:

Հասկացա, որ, իրոք, Հայաստանը գեղեցիկ երկիր է: Իսկ Հայոց լեզվի դասընթացներին մասնակցելը նոր գիտելիքների պաշար ինձ տվեց:

Արմինե Պալոյան-Վրաստան

 – Ցանկանում եմ այս գրությամբ հատկապես  ուշադրություն դարձնել Հայոց լեզի արագացված դասընթացին:

Ապրում եմ Վրաստանի հայաբնակ գյուղում: Ճիշտ է, այնտեղ խոսում ենք հայերեն, հաճախում հայկական դպրոց, բայց չենք ուսումնասիրում Հայոց պատմություն առարկան: Սակայն չեմ վհատվում. Հայրենիքիս մասին տեղեկություններ եմ ստանում ինքնուսուցմամբ՝ կամ համացանցի, կամ էլ ընթերցանության միջոցով:

Իսկ այս դասընթացներն ինձ մեծ հնարավորություն տվեցին ընդլայնել գիտելիքներիս սահմանը: Շատ շնորհակալ եմ ՀՀ սփյուռքի նախարարությանը «Արի տուն» ծրագիրը կազմակերպելու համար:

Արմինե Սիրադեղյան -ՌԴ, քաղաք Ռոստով

-Ես առաջին անգամ չեմ լինում Հայաստանում: Միշտ ամառային արձակուրդներին ձգտում եմ գալ և հանգիստս այստեղ անցկացնել:

Ուրախ եմ, որ ՀՀ սփյուռքի նախարարության «Արի տուն» ծրագրի միջոցով նույնպես կարողացա գալ Հայաստան:

 Մասնակցեցի այս ծրագրին, քանի որ ցանկանում  էի ավելի լավ բացահայտել Հայրենիքս: Ամենամեծ ձեռքբերումն այն էր սփյուռքահայ երիտասարդներիս համար, որ ծրագրի շրջանակում սկսեցինք բարելավել  հայերեն խոսելը:

Պատրաստեց Գևորգ  Չիչյանը