Հայոց ցեղասպանության թանգարան­ ինստիտուտի այցելուները այսուհետ հնարավորություն կունենան տեսնել Ավրորա Մարդիգանյանի ճամպրուկը, որով ճանապարհորդում էր ԱՄՆ­ում «Հոգիների աճուրդ» ֆիլմի ցուցադրությունների ժամանակ:

Ինչպես «Արմենպրես»-­ին տեղեկացրեց Հայոց ցեղասպանության թանգարան­ ինստիտուտի տնօրեն Հայկ Դեմոյանը, ճամպրուկը թանգարան­ինստիտուտի ցուցադրությունը կհամալրի հուլիսի 15­-ից: «Այս ճամպրուկը հատուկ պատրաստվել է երկարատև ճամփորդությունների համար: Ավրորա Մարդիգանյանն այն օգտագործել է իր պատմության հիման վրա և իր իսկ դերակատարմամբ նկարահանված ֆիլմը ցուցադրելու ժամանակ՝ ԱՄՆ-­ի խոշոր քաղաքներում շրջագայելու ընթացքում», ­ ասաց Հայկ Դեմոյանը:

«Ոսկե ծիրան» 12-­րդ Կինոփառատոնի բացմանը Հայոց ցեղասպանության թանգարան­ինստիտուտի տնօրեն Հայկ Դեմոյանը հանդիսականներին ներկայացրեց Հայոց ցեղասպանության ականատես ­ վերապրած Ավրորա Մարդիգանյանի (Արշալույս Մարտիկյան) պատմությունը և 1918թ. ԱՄՆ-­ում նկարահանված «Հոգիների աճուրդ» ֆիլմի ցուցադրությունների ժամանակ օգտագործված Ավրորա Մարդիգանյանի ճամփորդական ճամպրուկը: Ավրորա Մարդիգանյանի ճամպրուկը հայտնաբերել է Հայոց ցեղասպանության թանգարան­ինստիտուտի ջանքերով և ձեռք է բերվել «ՎիվաՍել­ՄՏՍ»­ի գլխավոր տնօրեն Ռալֆ Յիրիկյանի աջակցությամբ: Այն Հայաստան է տեղափոխվել Հրաչ Հաննեսյանի օգնությամբ: Ճամպրուկի վրա գրված է նրա անունը՝ Aurora Mardiganian և ֆիլմի անվանումը՝ Auction of Souls CO:

Հուլիսի 12-­ին Օպերայի և բալետի ազգային ակադեմիական թատրոնում «Ոսկե ծիրան» 12-­րդ Կինոփառատոնի բացման ժամանակ ներկայացվեց այս եզակի մասունքը, ինչպես նաև Ավրորա Մարդիգանյանի հուշագրության 1923 թվականին ճապոներեն թարգմանությամբ լույս տեսած բացառիկ հատորը, որը հնարավոր է եղել ձեռք բերել Ճապոնիայում բնակվող մեր հայրենակցուհու ջանքերով: