Մայիսի 12-ին Ավստրիայում ՀՀ դեսպանությանը կից գործող «Հայաստան» կենտրոնում տեղի ունեցավ Հայոց ցեղասպանությանը զոհ գնացած արևմտահայ գրողների գերմաներեն անթոլոգիաների շնորհանդեսը:

Միջոցառմանը ներկա էին Հայաստանի Գրողների միության նախագահ Էդվարդ Միլիտոնյանը և գրականագետ, բանասիրական գիտությունների դոկտոր Ավիկ Իսահակյանը:

Շնորհանդեսը բացվեց Ավստրիայում ՀՀ դեսպան Արման Կիրակոսյանի ողջույնի խոսքով, ով խոսեց Հայաստանում և Գերմանիայում տպագրված զույգ ժողովածուներից` կարևորելով դրանց արժեքն ու նշանակությունը:

Հայաստանի Գրողների միության նախագահ Էդվարդ Միլիտոնյանը ներկայացրեց գրքերի ստեղծման պատմությունը` հատուկ առանձնացնելով Հայաստանի երիտասարդական հիմնադրամի և Հայաստանի գրողների միության ներդրումը ժողովածուների պատրաստման և տպագրության իրականացման գործում:

Ավստրիացի գրող, թարգմանիչ Հերբերտ Մաուրերը ներկայացրեց իր նոր լույս ընծայած «Եվ Աստված խոսում է հայերեն» գերմանալեզու պատմվածքների և էսսեների ժողովածուն:

Շնորհանդեսին ներկայացվեց նաև 2015թ. տարեսկզբին Հայաստանում լույս ընծայված «Ավստրիական արձակ» անթոլոգիան, որը տպագրվել է «Անտարես» հրատարակչատան կողմից՝ ՀՀ մշակույթի նախարարության հովանավորությամբ: