Մարտի 23-ին ՀՀ սփյուռքի նախարար Հրանուշ Հակոբյանը աշխատանքային նախաճաշ-հանդիպում է ունեցել Ավստրալիայի ՀՅԴ կոմիտեի ներկայացուցիչ Հայկ Կայսերյանի, Ավստրալիայի Հայ դատի գրասենյակի ղեկավար Վաչէ Ղահրամանյանի և Ավստրալիայի Հայ դատի գործադիր տնօրեն Գրեգ Սողոմոնյանի հետ:

Հանդիպման ընթացքում քննարկվել են համայնքային հարցեր, անդրադարձ է կատարվել նաև Հայոց ցեղասպանության 100-րդ տարելիցին նվիրված ձեռնարկներին:

Այնուհետև նախարար Հրանուշ Հակոբյանը այցելել է Ռայդ քաղաք և հանդիպել Հայ տարեցների խմբի հետ: Հանդիպմանը ներկա են եղել 65-ից բարձր տարիքի շուրջ 110 անձինք:

Նախարարն այցելել է նաև տեղի Առաջնորդարան, որտեղ հանդիպել է Ավստրալիայի և Նոր Զելանդիայի Հայոց թեմի բարեխնամ առաջնորդ գերաշնորհ Տեր Հայկազուն Սրբազան Եպիսկոպոս Նաջարյանի և քաղաքի խորհրդի անդամ Սարգիս Եկելյանի հետ: Մի շարք հարցեր քննարկելուց հետո, նախարարը Սարգիս Եկելյանի ուղեկցությամբ շրջայց է կատարել քաղաքապետարանում:

Սփյուռքի նախարար Հրանուշ Հակոբյանի հանդիպումները Ավստրալիայում շարունակվում են: