Օտարները Հայոց Ցեղասպանության մասին. (մաս I) Հասան Մ. Յուսուֆ

Հասան Մ. Յուսուֆ. գրող, լրագրող, սցենարիստ: Ծնվել է 1948թ. փետրվար 1-ին` Սիրիայի Լաթաքիայի շրջանի Դալիա գյուղում: Յոթանասունականների սկզբին զբաղվել է մշակութային լրագրությամբ: 1978 թվականին եղել է «Թըշրին Էլ Տիմէշգիե» թերթի գլխավոր խմբագիրը, 1981-ին` Սիրիայի լրագրողների միության խորհրդի անդամ:
Հասան Մ. Յուսուֆի գրական գործերից են.
«Էլ Արիֆ Ղատպան» պատմվածքների հավաքածուն (1978), «Օրիորդ Սապհա» (1993): Ունի նաև թատերգություններ, որոնցից հիշատակության է արժանի «Էլ Քալըպ էլ Ազրաք» մանկական թատերգությունը: Հասան Յուսուֆի ստեղծագործությունների հիման վրա նկարահանվել են բազմաթիվ բազմասերիանոց կինոնկարներ և գեղարվեստական ֆիլմեր, որնցից կարելի է առանձնացնել «Ըխուեթ ալ Թուրապ» բազմասերիանոց կինոնկարը, որի մեջ անդրադարձ կա նաև Հայոց ցեղասպանությանը:
Հասան Մ. Յուսուֆի մի շարք գործեր թարգմանվել են անգլերեն, ֆրանսերեն, ռուսերեն և չինարեն լեզուներով:
Հասանի «Ըխուեթ ալ Թուրապ» դրաման պատմում է 4 դար Թուրքիայի տիրապետության տակ գտնվող Սիրիայում ծագած արաբական ապստամբության, ինչպես նաև` Հայոց ցեղասպանության` հայ ժողովրդի 1,5 միլիոն զոհերի մասին, որոնց միակ հանցանքը եղել է նրանց կրոնական պատկանելությունը: Ֆիլմի մեջ ներկայացվում են թուրքերի բարբարոսություններն ու ոճրագործությունները:
Դուբայում հրատարակվող «Arabianbusiness» կայք-էջի համաձայն` Հասան Յուսուֆը ընդգրկվել է աշխարհի ամենաազդեցիկ 100 արաբ մտավորականների շարքում:
Հեղինակ և հետազոտող Հասան Մ. Յուսուֆը 2014 թվականի ապրիլի 24-ին հյուրընկալվել է «Ալ Մայատին» հեռուստատեսության «Մըն էլ արտ» («Հողից») խորագիրը կրող հաղորդաշարին: «Հայերը հողի եղբայր են» թեմայով հարցազրուցի ժամանակ նա հետևյալն է ասել. «Հայերն օրինակ պետք է լինեն մեր պաղեստինցի եղբայրների համար, որոնց պահանջատիրության իրավունքը երբեք չի սպառվում: Հայերը լավագույն ձևով են պահանջում իրենց իրավունքը»: