Եվրասիա համագործակցության հիմնադրամի «Media Bus Tour» ծրագրի շրջանակներում Հայաստան այցելած թուրք լրագրողներն այցելեցին Հայոց ցեղասպանության թանգարան –ինստիտուտ: Նրանք եղան Հայոց ցեղասպանության թանգարանի ժամանակավոր ցուցադրությունների սրահում, ծանոթացան Հայոց ցեղասպանության մասին պատմող ժամանակավոր ցուցադրության հետ:

Այնուհետև հայ և թուրք լրագրողները հանդիպում և ակտիվ քննարկում ունեցան Հայոց ցեղասպանության թանգարան – ինստիտուտի տնօրեն, Հայոց ցեղասպանության 100-րդ տարելիցի միջոցառումները համակարգող պետական հանձնաժողովի քարտուղար Հայկ Դեմոյանի հետ: Այս մասին տեղեկացնում են ՀՑԹԻ մամուլի ծառայությունից: