ՄԵԾԱՀԱ՛ՐԳ ՊԱՐՈՆ ԴԵՍՊԱՆ

ՀԱՐԳԱՐԺԱ՛Ն ՏԻԿԻՆ ՔԱՂԱՔԱՊԵՏ,

ՀԱՐԳԵԼԻ՛ ՊԱՐՈՆ ԿՐԻԿՈՐՅԱՆ

ՎԱՌՆԱՅԻ «ԱՐԱՐԱՏ» ԸՆԿԵՐԱԿՑՈՒԹՅԱՆ ՍԻՐԵՐԼԻ՛ ԱՆԴԱՄՆԵՐ,

ԱՐՎԵՍՏԱԳՆԵՏՆԵ՛Ր ԵՎ ՀԱՅ ՀԱՄԱՅՆՔԻ ՆԵՐԿԱՅԱՑՈՒՑԻՉՆԵ՛Ր,

ՏԻԿՆԱ՛ՅՔ ԵՎ ՊԱՐՈՆԱ՛ՅՔ

Հայաստանի Հանրապետության սփյուռքի նախարարության անունից ջերմորեն ողջունում եմ ձեզ` Սոֆիայի արվեստի քաղաքային ցուցասրահում բուլղարահայ նշանավոր նկարիչ Բեդիգ Բեդրոսյանի կտավների ցուցահանդեսի բացման առիթով:

Ծնվելով ցեղասպանությունից մազապուրծ Բուլղարիա գաղթած հայի ընտանիքում՝ Բեդիգ Բեդրոսյանը դեռ վաղ մանկությունից նվիրվեց արվեստին և իր ապրած 77 տարիների ընթացքում ստեղծեց 600-ից ավելի նկար, որոնցից շատերը տարբեր ժամանակներում ցուցադրվել են Բուլղարիայի, Գերմանիայի և եվրոպական այլ երկրների հեղինակավոր պատկերասրահներում:

Բեդիգ Բեդրոսյանը մեծ ներդրում է ունեցել հայկական սփյուռքի մշակութային ժառանգության անդաստանում և վստահ եմ, որ նա նաև իր ուրույն տեղն ու դերն ունի Բուլղարիայի մշակույթի պատմության մեջ:

Մեծահա՛րգ քաղաքապետ՝ տիկին Ֆանդուկովա,

Շնորհակալության իմ խոսքն եմ հղում ցուցահանդեսը Ձեր բարձր հովանու ներքո կազմակերպելու համար: Շնորհակալ ենք նաև ցուցահանդեսի կազմակերպանն օժանդակողներին՝ տիկին Պալմենա Դիմիտրովա Ռաչևային, պրոֆեսոր Անգել Ստանևին, Սոֆիայի արվեստի քաղաքային ցուցասրահի ղեկավարությանը և բոլոր նրանց, ում անմիջական ջանքերի ու աջակցության շնորհիվ կյանքի է կոչվում այս կարևոր ձեռնարկը:

Ցուցահանդեսի կազմակերպումը, հիրավի, վկայությունն է հայ և բուլղար ժողովուրդների դարավոր բարեկամության, նվաճումներ ունենալու անկոտրում կամքի, ինչպես նաև մշակույթը պահպանելու և սերունդներին փոխանցնելու առաքելության:

Այս նախաձեռնությունը ևս մի հնարավորություն է ցուցահանդես այցելողների համար՝ տեսնելու, ճանաչելու տաղանդավոր նկարչի յուրահատուկ նկարչական ոճն ու վրձնի ձեռագիրը, ինչպես նաև հիանալու հայկական և բուլղարական մշակույթի միախառնումից ծնված նրա բարձրաճաշակ արվեստով և ստեղծած մնայուն գործերով:

Համոզված ենք, որ դարերի ընթացքում ձևավորված և բարի ավանդույթ դարձած հայ-բուլղարական ջերմ հարաբերությունները և համագործակցությունը շարունակական բնույթ կունենան և էլ ավելի կամրապնդեն հայ և բուլղար ժողովուրդների բարեկամությունը:

Ջերմ բարեմաղթանքներով՝

ՀՐԱՆՈՒՇ ՀԱԿՈԲՅԱՆ