Հունիսի 29-ին ՀՀ սփյուռքի նախարար Հրանուշ Հակոբյանն ընդունեց Ռումինիայի Հայոց թեմի առաջնորդ Գերաշնորհ Տեր Տաթև եպիսկոպոս Հակոբյանին:

Ողջունելով հյուրին՝ նախարարն արժևորեց հոգևոր առաջնորդի հայանպաստ գործունեությունը, բարձր գնահատեց վերջին տարիներին նրա իրականացրած աշխատանքը։

Սրբազան Հայրը շնորհակալություն հայտնեց ընդունելության համար, նշեց, որ Արցախյան քառօրյա պատերազմի օրերին եղել է Արցախում, հայ զինվորի կողքին: Հոգևոր առաջնորդը համոզված է, որ զինվորը նաև հոգևոր զորակցության կարիք ունի:

Զրույցի ընթացքում անդրադարձ կատարվեց համայնքի խնդիրներին, նախարարության ծրագրերին համայնքի մասնակցության ակտիվացմանը, քննարկվեցին և նախանշվեցին անելիքները:

Իր գործունեության ընթացքում Տաթև եպս. Հակոբյանը հիմնել է Շվեյցարահայ երիտասարդաց միությունը: Եղել է Հոլանդիայի Հայոց թեմի հոգևոր հովիվ, հիմնել է հինգ եկեղեցական ծխեր՝ Արնհեմ, Տոտրեխդ, Ասսըն, Այնթհովեն և Մաստրիխդ քաղաքներում, հիմնադրել է Ալմելոյի «Գեղարդ» երգչախումբը, կիրակնօրյա վարժարանը, Սուրբ Գրոց լսարանը և Հայ եկեղեցասիրաց կազմակերպությունը ( VAJA ):

2010թ. Ամստերդամի վարչության նախաձեռնությամբ Ամստերդամի Տիմըն գերեզմանոցում կանգնեցրել է խաչքար-հուշարձան` նվիրված Հայոց Ցեղասպանության նահատակների հիշատակին: Հրատարակել է Հոլանդիայի Հայոց հոգևոր հովվության պատկերազարդ եկեղեցական օրացույցը, կազմակերպել է Սուրբ Պատարագի հոլանդերեն թարգմանությունը: