«Արի տուն-2016» ծրագրի մասնակիցները, բացի Հայրենիքի տեսարժան վայրերում լինելուց, մայրաքաղաքի Եղ. Չարենցի անվան դպրոցում մասնակցում են նաև հայոց լեզվի  դասընթացների՝ այդ  ժամանակահատվածում հնարավորինս գիտելիքներ ձեռք բերելով մայրենիից ու գրականությունից: Դասընթացն անցկացնող մայրենիի ուսուցչուհու հանձնարարությամբ նրանք իրենց կարծիքներն են շարադրել Հայաստանի  մասին, ինչպես նաև  իրենց շնորհակալական խոսքն են հայտնել  ջերմ ընդունելության համար: 

«Առաջին  օրերին շատ էի հուզված՝ ընտանիքիցս հեռու լինելու պատճառով, բայց Հայաստանում շրջելուց հետո տրամադրությունս բարձրացավ և շատ ուրախ եմ, որ այստեղ եմ: Իմ հողի ծառերին ու իմ երկրի ճաշերին սիրահարվեցի: Այսօր վերջին օրն է, դրա համար շատ եմ տխրում: Հայաստանն այսպիսին, այսքա՜ն գեղեցիկ դարձնելու համար հայերը շատ ջանք թափեցին, որպեսզի այն փոխանցեն նոր սերնդին: Շա՛տ շնորհակալություն հայաստանցիներին. շնորհակալությու՛ն Հայաստան, շնորհակալությու՛ն Սփյուռքի նախարարություն»,- գրել է  2-րդ փուլի  մասնակից  Այսիմա Լարիսա Քըլըչերը՝ Թուրքիայից:

«-Հայաստա՛ն, բարև: Այս ի՜նչ գեղեցիկ  է Արարատի տեսարանը:

-Ի՞նչ է,  դու չե՞ս տեսել Արարատն այս կողմից:

-Չէ, չեմ տեսել, շատ հեռու է ինձնից:

-Նայի՛ր, այնքան էլ հեռու չէ, տեսա՞ր:

-Այո՛… գեղեցիկ է,  օրերով կարող եմ նայել ու չկշտանալ: Հիմա հասկացա, թե ինչու այստեղ ամեն ինչի անունն Արարատ է…»,- այսպիսի փոքրիկ  մի զրույցով է Հայաստանի մասին իր զգացումներն արտահայտել Թուրքիայից եկած երեխաների խմբի ղեկավար, 24-ամյա Նադիա Դուրաքօղլուն:

«Շնորհակալությու՛ն ՀՀ սփյուռքի նախարարությանն՝ այս գեղեցիկ ծրագրի համար. այն մեզ հնարավորություն է ընձեռում ճանաչել մեր Հայրենիքի մշակույթը, ավելի մոտիկից ծանոթանալու ավանդույթներին ու պատմամշակութային արժեքներին: Շա՛տ  շնորհակալություն տիկին Շողիկին, ով կարճ ժամանակահատվածում մեզ սովորեցրեց հայոց այբուբենը, սովորեցրեց երգեր, պարեր: Այդ ամենը մեզ համար շատ հետաքրքիր նորություն էր»,- իր հիացական վերաբերմունքն է արտահայտել Մոսկվայից եկած 15-ամյա Արթուր Մանուկյանը:

«Ես շատ շնորհակալ եմ  «Արի տուն» ծրագրի բոլոր կազմակերպիչներին: Ծրագրի շնորհիվ ես տեսա իմ Հայրենիքը, սովորեցի  հայերեն խոսել, սովորեցի իմ Հայրենիքի պատմության կարևոր դրվագները: Շնորհակալություն եմ հայտնում հայոց  լեզվի ուսուցչուհուն: Շատ ուրախ եմ, որ ընդգրկվեցի այս կարևոր ծրագրում»,-գրել է   ծրագրի 2-րդ փուլի մասնակից  Մոսկվայից եկած 13 տարեկան Մերի Պետրոսյանը:

«Արի տուն» ծրագրի շնորհիվ ես հրաշալի ամառ անցկացրի Հայաստանում, շփվեցի տարբեր երկրներից եկած հայ երեխաների հետ: Անսահման շնորհակալ եմ ՀՀ սփյուռքի նախարարությանը՝ մեզ այսպիսի հնարավորություն ընձեռելու համար»,-  այսպես է գրել ՌԴ-ի Օբնինսկ քաղաքից 14 տարեկան Լիանա Թադևոսյանը՝ շարադրանքի վերջում   իր նկարած   խորհրդանշական սրտիկների պատկերով ասես ցանկանալով մեկ անգամ ևս ընդգծել Հայրենիքի ու ծրագրի հանդեպ տածած իր ջերմ վերաբերմունքն ու երախտագիտությունը:   

 Կարինե Ավագյան

«Հայերն այսօր»