«Արի տուն-2016» ծրագիրի մասնակիցները, բացի Հայրենիքի տեսարժան վայրեր այցելելեն , մայրաքաղաքի Եղ. Չարենցի անուան դպրոցին մէջ կը մասնակցին նաեւ հայոց լեզուի  դասընթացներու` այդ  ժամանակահատուածին հնարաւորինս գիտելիքներ ձեռք բերելով Մայրենիէն ու գրականութենէն: Դասընթացքը իրականացնող Մայրենիի ուսուցչուհիի յանձնարարութեամբ անոնք իրենց կարծիքները շարադրած են Հայաստանի  մասին, ինչպէս նաեւ  իրենց շնորհակալական խօսքը յայտնած   ջերմ ընդունելութեան համար:

«Առաջին  օրերուն շատ յուզուած էի` ընտանիքէս հեռու ըլլալու պատճառով, բայց Հայաստանի մէջ շրջելէ ետք  տրամադրութիւնս բարձրացաւ եւ շատ ուրախ եմ, որ այստեղ եմ: Իմ հողի ծառերուն ու իմ երկրի ճաշերուն սիրահարուեցայ: Այսօր վերջին օրն է, ատոր համար  շատ կը տխրիմ: Հայաստան այսպիսին, այսքա՜ն գեղեցիկ դարձնելու համար հայերը շատ ջանք թափեցին, որպէսզի այն փոխանցեն նոր սերունդին: Շա՛տ շնորհակալութիւն հայաստանցիներուն. շնորհակալութիւ՛ն Հայաստան, շնորհակալութիւ՛ն Սփիւռքի նախարարութեան»,- գրած է  2-րդ փուլի  մասնակից  Այսիմա Լարիսա Քըլըչերը` Թուրքիայէն:

«-Հայաստա՛ն, բարեւ: Այս ի՜նչ գեղեցիկ  է Արարատի տեսարանը:

-Ին՞չ է,  դուն չե՞ս տեսած Արարատը այս կողմէն:

-Չէ, չեմ տեսած, շատ հեռու է ինծմէ:

-Նայի՛ր, այնքան ալ հեռու չէ, տեսա՞ր:

-Այո՛… գեղեցիկ է,  օրերով կրնամ նայիլ ու չկշտանալ: Հիմա հասկցայ, թէ ինչու այստեղ ամէն ինչի անունը Արարատ է…»,- այսպիսի փոքրիկ   զրոյցով մը Հայաստանի մասին իր զգացումները արտայայտած է Թուրքիայէն եկած երեխաներու խումբի ղեկավար, 24-ամեայ Նատիա Տուրաքօղլուն:

«Շնորհակալութիւ՛ն ՀՀ սփիւռքի նախարարութեան` այս գեղեցիկ ծրագիրին համար. այն մեզի հնարաւորութիւն կ’ընձեռէ ճանչնալու մեր Հայրենիքի մշակոյթը, աւելի մօտէն ծանօթանալու աւանդոյթներուն ու պատմամշակութային արժէքներուն: Շա՛տ  շնորհակալութիւն տիկին Շողիկին, որ կարճ ժամանակահատուածի մէջ մեզի սորվեցուց հայոց այբուբենը, սորվեցուց երգեր, պարեր: Այդ ամէնը մեզի համար շատ հետաքրքիր նորութիւն էր»,- իր հիացական վերաբերմունքը արտայայտած է Մոսկուայէն եկած 15-ամեայ Արթուր Մանուկեանը:

«Ես շատ շնորհակալ եմ  «Արի տուն» ծրագիրի բոլոր կազմակերպիչներուն: Ծրագիրի շնորհիւ ես տեսայ իմ Հայրենիքս, սորվեցայ  հայերէն խօսիլ, սորվեցայ  Հայրենիքիս պատմութեան կարեւոր դրուագները: Շնորհակալութիւն կը յայտնեմ հայոց  լեզուի ուսուցչուհիին: Շատ ուրախ եմ, որ ընդգրկուեցայ այս կարեւոր ծրագիրին»,-գրած է   ծրագիրի 2-րդ փուլի մասնակից  Մոսկուայէն եկած 13 տարեկան Մերի Պետրոսեանը:

«Արի տուն» ծրագիրի շնորհիւ ես հրաշալի ամառ անցուցի Հայաստանի մէջ, շփուեցայ տարբեր երկիրներէ եկած հայ երեխաներու հետ: Անսահման շնորհակալ եմ ՀՀ սփիւռքի նախարարութեան` մեզի այսպիսի հնարաւորութիւն ընձեռելու համար»,-  այսպէս  գրած է ՌԴ-ի Օպնինսկ քաղաքէն 14 տարեկան Լիանա Թադեւոսեանը` շարադրութեան վերջաւորութեան   իր նկարած   խորհրդանշական սրտիկներու պատկերով կարծես կը ցանկար  անգամ մը եւս ընդգծել Հայրենիքի ու ծրագիրին հանդէպ տածած իր ջերմ վերաբերմունքն ու երախտագիտութիւնը:

 Կարինէ Աւագեան

«Հայերն այսօր»