Օգոստոսի 3-ին ՀՀ սփյուռքի նախարարությունում տեղի ունեցավ  «Արի տուն» ծրագրի վեցերորդ փուլի բացման հանդիսավոր արարողությունը:

 Ողջունելով արիտունցիներին՝ ՀՀ սփյուռքի նախարար Հրանուշ Հակոբյանը մասնավորապես նշեց. «Սիրելի երիտասարդներ, ես շատ ուրախ եմ, որ դուք Հայաստանում եք, բարով եք եկել: Կատարվել է ձեր նվիրական երազանքը: Ձեզնից շատերն առաջին անգամ են Հայաստանում, բայց արդեն ստացել են առաջին տպավորությունները: Այս ծրագիրը համահայկական ծրագիր է, այն դարձել է մի յուրօրինակ միջոց  Հայրենիքը տեսնելու, վայելելու, նրանով հպարտանալու, սիրելու և վերադառնալու համար: Հավատում եմ, որ անկրկնելի ժամանակ կանցկացնեք ձեր Պատմական Հայրենիքում: Հավատում եմ, որ այս օրերը կդառնան ձեր կյանքի լավագույն, անմոռանալի երկու շաբաթը, և դուք  կկարոտեք Հայաստանը, կմտածեք վերադառնալու մասին: Հաջողություն եմ մաղթում ձեզ և ջերմ, ուրախ, ակտիվ օրեր: Մենք ձեզ սիրում ենք և միշտ ձեզ հետ ենք լինելու այս օրերի ընթացքում»:

 Նախարարը հատուկ շնորհակալություն հայտնեց կանադահայ բարերար Ռաֆֆի Պետրոսյանին՝ Դերսիմից և Դիարբեքիրից իսլամացած հայերի ստվար խմբի մասնակցությունը ծրագրին հնարավոր դարձնելու համար:

 Իր շնորհակալական խոսքում Ռաֆֆի Պետրոսյանը նշեց. «Ուրախ եմ, որ Հայաստանի կառավարությունը ընդառաջել է մեր ցանկությանը և Սփյուռքի նախարարությունը սիրով ընդունել է Դերսիմից ու Դիարբեքիրից Հայրենիք եկած խումբը: Այս այցելությունը կօգնի նրանց ճանաչել իրենց արմատները, ծանոթանալ Մայրենիին և իրենց պապերի հավատքին՝ քրիտոնեությանը, իրենց ազգային ինքնությանը վերադառնան: Այս շարժումն ավելի պիտի զորանա»:

 Նախարարը, ավանդույթի համաձայն, «Արի տուն» ծրագրի մասնակցի շապիկ հագցրեց 15 ամյա Ադամ Ադամյանին:

 «Արի տուն» ծրագրի վեցերորդ փուլի մասնակիցներին ողջունեց նաև Վանաձորի դրամատիկական թատրոնի դերասան, ասմունքող Ջիվան Սարգսյանը: «Մենք քիչ ենք, սակայն մեզ հայ են ասում» բանաստեղծության նրա  կատարումը բուռն ծափերի արժանացավ:

 Ելույթ ունեցավ «Վալենսիա» համալիրի նվագախումբը: Ազգային երաժշտության հնչյունների ներքո արիտունցիներն ուրախ շուրջպար բռնեցին:

 «Արի տուն» ծրագրի 6-րդ փուլի մասնակցելու համար Հայաստան է ժամանել 197 երիտասարդ 17 երկրից՝  ՌԴ-ից, Ուկրաինայից,  Թուրքմենստանից, Ղրղզստանից,  Մեծ Բրիտանիայից, Պորտուգալիայից, Բելգիայից,  Նիդերլանդներից, Իսպանիայից, Գերմանիայից, Ֆրանսիայից, ԱՄՆ-ից, Արգենտինայից, Սիրիայից, Լիբանանից, Իրանից, Թուրքիայից: