Հալեպի Աշրաֆիե թաղամասը, որը ժամանակին հայաշատ էր, նախօրեին ռմբակոծությունների թիրախում է հայտնվել: Այս մասին «Արմենպրես»­-ի հետ զրույցում տեղեկացրեց Բերիո թեմի ազգային առաջնորդարանի խոսնակ Ժիրայր Ռեիսյանը` ավելացնելով, որ թաղամասում այժմ հայեր չեն բնակվում:

«Ռմբակոծությունները սկսվել են հուլիսի 2­ի երեկոյան և շարունակվել մինչև առավոտ: Արդեն մեկ ժամ է` իրավիճակը հանգիստ է, իսկ պատճառած վնասների մասին դեռ տեղեկություններ չկան»,­ նշեց նա: Ռեիսյանը նաև տեղեկացրեց, որ Աշրաֆիեի ռմբակոծությունը սկսվել է հրասանդներով ու հրթռիներով, ապա միջամտել են հրետանիները, իսկ հետո ռմբակոծությունները շարունակել են օդային ուժերը: Նա նաև հիշեցրեց մշտական առկա խնդիրների մասին` կապված էլեկտրականության, ջրի ու համացնացի հետ:

Ինչ վերաբերում է օդի ջերմաստիճանին, Ռեիսյանի խոսքով՝ այս տարի մնացած տարիների համեմատությամբ Հալեպում այնքան էլ բարձր չէ օդի ջերմաստիճանը: Հալեպ քաղաքը 2012թ. ամռանից ի վեր հայտնվել է կառավարական ուժերի և զինված տասնյակ խմբավորումների բախումների թիրախում: Բախումներն այնտեղ մինչև օրս շարունակվում են: Քաղաքի արևմտյան թաղամասերը գտնվում են կառավարական ուժերի, իսկ արևելյան թաղամասերը` զինված խմբավորումների հսկողության տակ: