Թումանյանի յուրաքանչյուր մեկ բառը մի աշխարհ է. այս շեշտադրումով էին առաջնորդվում Գյումրու թիվ 19 հիմնական դպրոցի աշակերտները՝  բեմականացման ընթացքում խոսելով  զուլալ, մաքրամաքուր ժողովրդական բառ ու բանով: Միջոցառումը կազմակերպվել էր ՀՀ սփյուռքի նախարարության «Մեր մեծերը» ծրագրի շրջանակում՝ իբրև արձագանք նախարարության կոչի:

Ներկայացումը աշխատասիրության, կյանքում ճիշտ ապրելու գովերգն էր: Այն նաև սովորեցնում էր ու զգուշացնում, որ կյանքում շատ «անբան հուռիներ» զարտուղի ճանապարհներով գտնում են իրենց «երջանկությունը» և Նազարի նման ծիծաղում աշխարհի վրա:

Հ.Թումանյանը մեր գիտակցության մեջ ապրում է որպես Ամենայն հայոց բանաստեղծ:

Բեմը հիշեցնում էր հեքիաթային մի աշխարհ: Աշակերտները քաջատեղյակ էին Հ. Թումանյանի կյանքին ու ստեղծագործությանը: Ցերեկույթի ընթացքում բեմականացվեց «Անբան Հուռին» հեքիաթը: Աշակերտներն իրենց արտիստիկ խաղով և թումանյանական  ժողովրդախոսակցական բառուբանի միջոցով հանդիսատեսին տարել էին թումանյանական աշխարհ՝ իր Լոռվա չքնաղ, մթին ձորերով, Դեբեդի շառաչով, Չաթինդաղ լեռան վեհությամբ: Բոլորը հասկացան, որ «Թումանյանն է անհաս Արարատը մեր նոր քերթության»,  ուր՝ Տիեզերքում աստվածային  թափառում է իմ հոգին…

Հիշեցնենք՝ հայ մեծ բանաստեղծ Հովհաննես Թումանյանը ընդգրկված է Սփյուռքի նախարարության 2014 թ. Մեծերի շարքում: