Դեռևս հաշված օրեր են անցել ՀՀ սփյուռքի նախարարության հնչեցրած համահայկական կոչից՝ 2017 թվականը համայն հայության համար դարձնելու Արցախի տարի, և արդեն բազմաթիվ արձագանքներ կան սփյուռքյան համայնքներից, հայկական դպրոցներից ու միություններից:

«Դու՛ ի՞նչ ես անում Ղարաբաղի համար» խորագրով շարժման հայտարարությունը տարածվել է Սփյուռքի մի շարք լրատվամիջոցներում, ինչի արդյունքում քիչ չեն նաև այս կամ այն նախաձեռնությամբ հանդես գալու առաջարկ ներկայացրած կառույցները:

Ալմելոյի և Նոր Ջուղայի հայկական համայնքներն արդեն իսկ իրականություն են դարձրել իրենց նախաձեռնությունը: Մասնավորապես, ինչպես հաղորդում է «Հայերն այսօր»-ը, Ալմելոյում՝ Հայ առաքելական Սուրբ Գրիգոր Լուսավորիչ եկեղեցու սրահում, տեղի  է ունեցել  «Աջակցել Լեռնային Ղարաբաղին» ակցիայի գործողությունների մասին միջոցառումը: Իսկ Նոր Ջուղայում աշնանային մթերքների վաճառք են կազմակերպել՝ ի զորակցություն արցախահայությանը:

Ռուսաստանի Դաշնության Ուֆա և Օբնինսկ քաղաքներում գործող կիրակնօրյա հայկական դպրոցների, Քուվեյթի ազգային վարժարանի սաներն էլ միացել են հայկական աշխարհում ձեռնարկը հանրայնացնելու կոչին՝ «Դու՛ ի՞նչ ես անում Ղարաբաղի համար» գրությամբ պաստառներով լուսանկարներ տեղադրելով իրենց էջերում:

Նշենք, որ Եվրոպաի, ԱՄՆ-ի ու Ռուսատանի մի շարք համայնքներում առաջիկա օրերին ևս տեղի կունենան Արցախին նվիրված մշակութային, բարեգործական միջոցառումներ, որոնց մասին տեղեկատվությունը «Հայերն այսօր»-ը կներակայացնի իր էջերում: