Դեռեւս հաշուած օրեր  անցած են ՀՀ սփիւռքի նախարարութեան հնչեցուցած համահայկական կոչին` 2017 թուականը համայն հայութեան համար դարձնելու Արցախի տարի, եւ արդէն բազմաթիւ արձագանքներ կան սփիւռքեան համայնքներէն, հայկական դպրոցներէն ու միութիւններէն:

«Դո՛ւն ի՞նչ կ’ընես Ղարաբաղի համար» խորագիրով շարժումին յայտարարութիւնը տարածուած է Սփիւռքի  շարք մը լրատուամիջոցներու մէջ, որուն արդիւնքով քիչ չեն նաեւ այս կամ այն նախաձեռնութեամբ հանդէս գալու առաջարկ ներկայացուցած կառոյցները:

Ալմելոյի եւ Նոր Ջուղայի հայկական համայնքները արդէն իսկ իրականութիւն  դարձուցած են իրենց նախաձեռնութիւնը: Մասնաւորապէս, ինչպէս կը հաղորդէ «Հայերն այսօր»-ը, Ալմելոյի մէջ` Հայ առաքելական Սուրբ Գրիգոր Լուսաւորիչ եկեղեցւոյ սրահին մէջ, տեղի   ունեցած է  «Աջակցիլ Լեռնային Ղարաբաղին» արշաւի գործողութիւններուն մասին ձեռնարկը: Իսկ Նոր Ջուղայի մէջ աշնանային մթերքներու վաճառք  կազմակերպած են` ի զօրակցութիւն արցախահայութեան:

Ռուսաստանի Դաշնութեան Ուֆա եւ Օպնինսկ քաղաքներուն մէջ գործող կիրակնօրեայ հայկական դպրոցներու, Քուէյթի ազգային վարժարանի սաներն ալ միացած են հայկական աշխարհի մէջ ձեռնարկը հանրայնացնելու կոչին` «Դո՛ւն ի՞նչ կ’ընես Ղարաբաղի համար» գրութեամբ պաստառներով լուսանկարներ տեղադրելով իրենց էջերուն վրայ:

Նշենք, որ Եւրոպայի, ԱՄՆ-ի ու Ռուսատանի  շարք մը համայնքներու մէջ յառաջիկայ օրերուն եւս տեղի կ’ունենան Արցախին նուիրուած մշակութային, բարեգործական ձեռնարկներ, որոնց մասին տեղեկատուութիւնը «Հայերն այսօր»-ը կը ներակայացնէ իր էջերուն վրայ: