«Հայերն այսօրի» փոխանցմամբ՝ դատապարտելով օգոստոս 13-ին տեղի ունեցած հարձակումը` Հայ իրավաբանների միությունը հայտարարության մեջ կոչ է անում Թուրքիայի իշխանություններին, որ երաշխավորեն «Արմեն» ճամբարում հերթապահող երիտասարդների ապահովությունը, միաժամանակ շեշտելով, թե անմիջական, ամբողջական և թափանցիկ հետաքննություն պետք է կատարվի հարձակման կապակցությամբ, որպեսզի պատասխանատուները բացահայտվեն և արդար պատիժ ստանան:

Միությունը նաև նշում է, որ «Արմեն» ճամբարը հայերից խլելու արարքը խախտում է Լոզանի դաշնագրի և Մարդու իրավունքների եվրոպական կոնվենցիայի մի շարք պայմաններ` հավելելով, որ իրավաբանորեն ճամբարը պատկանում է Գետիկփաշայի Հայ ավետարանական եկեղեցու հիմնարկին:

Հայ իրավաբանների միությունը նաև կոչ է անում Սփյուռքի հայկական բոլոր կազմակերպություններին, որ այս գծով բողոքի ձայն բարձրացնեն ու պահանջեն ո´չ միայն հարձակման պատասխանատուների դատապարտումը, այլև` ճամբարի վերադարձը հայերին: